İkinci Qarabağ savaşında mənfur, yağı düşmənlərimiz üzərində qazandığımız möhtəşəm Zəfərdən sonra Azərbaycanın müvəffəqiyyətləri əvvəlki illərdə olduğu kimi günbəgün artmaqda davam edir. Birmənalı olaraq artıq həllini tapan Qarabağ məsələsi Azərbaycanın qüdrətli dövlət olmasının növbəti bariz nümunəsidir. Artıq istəməsə belə bir sıra ikili standartlar sərgiləyən ATƏT reallığı, yəni Qarabağın Azərbaycanın tərkib hissəsi olduğunu qəbul edib. Azərbaycanın milli maraqlarının təmin olunması istiqamətində həyata keçirilən ardıcıl və məqsədyönlü siyasətin növbəti böyük uğurlarından biri Ali baş komandanımız, Müzəffər dövlətimizin başçısı cənab İlham Əliyevin Belçikanın paytaxtı Brüsselə səfəri, Avropa İttifaqı Şurasının Prezidenti Şarl Mişel, Ermənistan baş naziri Nikol Paşinyanla görüşləri və əldə olunmuş nəticələrdir.
Bildiyimiz kimi ilk üçtərəfli görüş 2021-ci il dekabrın 14-də keçirilib, bununla da Prezident İlham Əliyev və Şarl Mişel tərəfindən Belçikanın paytaxtında Brüssel sülh gündəliyinin əsası qoyulub. Proseslərin davamı və inkişafı olaraq tərəflər arasında intensiv təmaslar aparılıb, telefon danışıqları keçirilib. Ölkə rəhbərinin qalib ölkəni təmsil etməsi bizi qürurlandırmaqla yanaşı, bir daha dialoqlarda sübut edir ki, Ermənistan həm münaqişə meydanında, həm də danışıqlar masasında diz çöküb, ağır məğlubiyyəti qəbul etmişdir. Ədalətli sülhün və Azərbaycanın ərazi bütövlüyünün təmin olunması istiqamətində mühüm qərar qəbul olunmuşdur. Aprelin 6-da 4 saat yarımdan artıq davam edən görüşün nəticəsi olaraq Ermənistanla Azərbaycan arasında sülh müqaviləsi üzrə danışıqların başlanması və bununla bağlı işçi qrupun yaradılması qərara alınıb. Məsələ ilə əlaqədar Azərbaycan və Ermənistan xarici işlər nazirliklərinə müvafiq təlimatlar verilib. Sülh razılaşmasının əsas komponenti Azərbaycanın irəli sürdüyü 5 maddədən ibarət təklif və bunun əsasında predmetli danışıqların aparılmasıdır. Sözügedən sənəddə əsas məqam Azərbaycanın ərazi bütövlüyüdür ki, Ölkə Prezidenti hər zaman ölkəmizin milli maraqlarını hər şeydən üstün tutur.
Xüsusilə qeyd edilməlidir ki, bu görüş regional sülhün bərqərar olunmasına xidmət edir. Tərəflərin sərhəd məsələləri üzrə birgə komissiya yaratması, birinci növbədə sərhədlərin delimitasiya prosesinə başlaması barədə razılıq əldə olunub. Bunun nəticəsi olaraq da sərhəddə gərginlik aradan qaldırılır. İşğaldan azad olunmuş ərazilərin minalardan təmizləmə, itkin düşmüş şəxslərin tapılması, eləcədə quruculuq işlərində Avropa İttifaqı tərəfindən Azərbaycana dəstək göstərilməsi də nəzərdə tutulur. Bütün bunlarda Azərbaycanın haqq işinə verilən dəstəyin göstəricisidir. Həmin istiqamətdə nəqliyyat-kommunikasiya xətlərinin bərpası və yaradılması, dəmir yolu və avtomobil yolunun çəkilməsi, İqtisadi Məşvərət Şurası mexanizminin yaradılması qərara alınmışdır. Bu kimi böyük infrastruktur layihələrin həyata keçirilməsi bizim iqtisadi imkanlarımızın inkişafına xidmət edir.
Diqqət çəkən sevindirici məqamlardan biri də imzalanan sənəddə “Dağlıq Qarabağ” ifadəsi və ya keçmişin qalığı olan ATƏT-in Minsk Qrupu həmsədrlik institutuna istinadın olmamasıdır. Sözügedən fakt onu göstərir ki, Avropa İttifaqı 44 günlük Vətən müharibədən sonra yaranmış yeni geosiyasi reallığı qəbul edir və öz mövqeyində yaranmış yeni reallığa əsaslanır. Münaqişə həll olunduğuna görə ATƏT-in Minsk Qrupu lazımsız təsisata çevrilib. Avropa İttifaqının dəstəyi ilə Ermənistan və Azərbaycan arasında birbaşa danışıqları nəzərdə tutan yeni mexanizm və format yaranmışdır.
Beynəlxalq nüfuzlu təşkilatlar, bütün dünya və həmçinin görüşə ev sahibliyi edən Avropa İttifaqı Prezident İlham Əliyevin regional liderliyini qəbul edir. Avropa İttifaqı Azərbaycan Prezidenti ilə yaxın təmasları Cənubi Qafqaz regionunda sülh və sabitliyin bərqərar olmasında mühüm amil kimi görür. Son iki ayda Azərbaycan Prezidenti ilə dünya liderləri, dövlət və hökumət başçıları arasında dialoq, telefon danışıqları, Prezident İlham Əliyevə ünvanlanmış məktublar dövlət başçımızın dünyada böyük nüfuzunun göstəricisidir. Hərbi münaqişə meydanında olduğu kimi diplomatik müstəvidə də Azərbaycanın qələbəsi danılmazdır. Hazırda Ermənistanda gedən proseslər və Erməni cəmiyyətində hökm sürən əhval-ruhiyyə onu göstərir ki, Azərbaycan Prezidentinin siyasi-diplomatik səyləri böyük səmərə verir və Ermənistanın müxtəlif iddialarla prosesi ləngitmək cəhdləri iflasa uğrayır. Ancaq bunun əksi olaraq, Azərbaycanda vəziyyət sabitdir, iqtisadiyyatımız hər gün daha da güclənir, ölkəmiz inkişafın ən üst səviyyəsinə qalxır və xalqımız aparılan müdrik siyasət nəticəsində sülh və əmin-amanlıq şəraitində yaşayır. Bu onu göstərir ki, diplomatik müstəvidə Azərbaycan tam qələbə qazanıb.
YAP Bərdə rayon təşkilatının təbliğat qrupunun üzvü, Bərdə rayonu 3 nömrəli tam orta məktəbin tarix müəllimi Cəfərova Elnarə
