Son günlər havaların yağmursuz keçməsi nəticəsində çaylarda, o cümlədən Kür çayına tökülən çaylarda sululuğun azalması müşahidə olunub. Bunu Milli Hidrometeorologiya Xidmətinin Hidrologiya Mərkəzinin direktoru Asif Verdiyev bildirib.
Onun sözlərinə görə, Kür çayının yuxarı axınında-Qıraqkəsəmən məntəqəsində aprelin 6-dan başlayaraq suyun səviyyəsi 97 sm azalıb. Hazırda su sərfi 365 m3/san olmaqla normanın 49 faizini təşkil edir ki, bu da keçən il ilə müqayisədə 6 faiz azdır.
“Qanıx çayının Cəlayir məntəqəsində suyun səviyyəsi 106 sm azalıb, hazırda su sərfi 88,5 m3/san olmaqla normanın 53 faizini təşkil edir ki, bu da keçən il ilə müqayisədə 16 faiz azdır.
Kür çayının aşağı axınında Yevlax məntəqəsində suyun səviyyəsində ciddi dəyişiklik olmayıb, hazırda su sərfi 122 m3/san olmaqla normanın 45 faizini təşkil edir ki, bu da keçən ilə yaxındır.
Kür-Zərdab məntəqəsində aprelin 15-dən başlayaraq suyun səviyyəsi 61 sm azalıb, hazırda su sərfi 103 m3/san olmaqla normanın 33 faizini təşkil edir ki, bu da keçən il ilə müqayisədə 19 faiz azdır.
Kür-Surra məntəqəsində aprelin 14-dən başlayaraq suyun səviyyəsi 35 sm azalıb, hazırda su sərfi 90 m3/san olmaqla normanın 12 faizini təşkil edir ki, bu da keçən ilə yaxındır.
Kür-Şirvan məntəqəsində aprelin 15-dən başlayaraq suyun səviyyəsi 10 sm azalıb, hazırda suyun səviyyəsi 129 sm olmaqla keçən il ilə müqayisədə 12 sm çoxdur.
Kür-Salyan məntəqəsində aprelin 17-dən suyun səviyyəsi 25 sm azalıb, hazırda suyun səviyyəsi 358 sm olmaqla keçən il ilə müqayisədə 6 sm azdır.
Kür-Bankə məntəqəsində aprelin 14-dən suyun səviyyəsi 18 sm azalıb, hazırda suyun səviyyəsi 79 sm olmaqla keçən il ilə müqayisədə 34 sm aşağıdır.
Araz çayının Novruzlu məntəqəsində isə aprelin 13-dən başlayaraq suyun səviyyəsi 30 sm azalıb, hazırda suyun səviyyəsi 60 sm olmaqla keçən il ilə müqayisədə 22 sm çoxdur”.
A.Verdiyev qeyd edib ki, hazırda Böyük Qafqazın Balakən-Şəki bölgəsi çaylarında sululuq normadan 17 faiz çox, Oğuz-Qəbələ bölgəsi çaylarında normadan 25 faiz az, Quba-Xaçmaz bölgəsi çaylarında normadan 7 faiz az, Kiçik Qafqazın çaylarında isə normadan 53 faiz azdır. Yaxın günlər ərzində gözlənilən yağıntılarla əlaqədar çaylarda sululuğun artacağı gözlənilir.
