“Əlimdə müqavilə var, amma bəzi adamlar serial üçün yazdığımız ssenarini öz adına çıxarmağa çalışırlar”.
ARANTV.AZ bildirir ki, bunu ssenarist və jurnalist, 2019-2020-ci illərdə “Sinemazadeh” şirkəti ilə müqavilə əsasında çalışmış Şəfaqət Cavanşir redaksiyamıza ünvanladığı şikayətində vurğulayıb.
Onun sözlərinə görə, adı çəkilən şirkətlə 2019-cu ilin avqustunda hal-hazırda ATV kanalında yayımlanan “Ofis işi” serialının redaktoru və ssenaristi kimi müqavilə bağlayıb. Lakin özünü şirkətin direktoru kimi təqdim edən Cəfər Axundzadə bağladığı müqaviləyə əsasən jurnalistin əmək haqqını tam ödəməyib.
“Cəfər Axundzadəni demək olar ki, ssenari yazılan müddəti nadir hallarda görmüşəm.
Əslində serialın birinci bölümü iki il bundan əvvəl ATV kanalında yayımlanıb. Lakin şirkət ikinci bölümü kanala zamanında təhvil verə bilmədi. Müqaviləm də normal hazırlanmamışdı. Belə ki, sənəddə redaktor kimi göstərilmişəm, amma redaktor olaraq pulumu almamışam, pulum qeyd olunmayıb. Ssenarist olaraq yazılan bənd də isə göstərilən aylıq gəlirimi tam almamışam. Serial efirə gedir, müqavilədə yazıldığı kimi redaktor olduğum qeyd olunmayıb. Sual yaranacaq ki, müqaviləni əzəldən oxumamışammı? İşin qızğın vaxtında müqaviləni bağladılar, düzü, tam oxumağa vaxtım da olmadı. Etiraf edim ki, bu mənim öz səhvimdir”, – Ş.Cavanşir bildirib.
O, daha sonra vurğulayıb ki, ölkədə COVİD-19 koronavirusu ilə bağlı karantin rejimi elan olunanda çəkilişlər dayanıb, çəkiliş heyətinə karantindən sonra işin davam edəcəyi və aylarca verilməyən maaşlarının köçürüləcəyi deyilib: “Daha sonra Nərgiz adlı bir xanım WhatsApp qrupunda ssenaristlərin pulunun verildiyini yazdı.Təsəvvür edin, xanım 100 manatlıq avansı mənə atır, maaş olduğunu qeyd edir və mən haqlı olaraq acıqlananda, xanım mənə kitab oxumağı məsləhət görür. C.Axundzadə isə pulumun nə zaman verəcəyini soruşduqda isə, ” Ürəyim nə zaman istəsə o zaman verəcəm” cavabını kollektiv arasında verdi. Mən işi məhkəməyə verdikdən sonra Nərgiz adlı xanım mənə mesajla şirkətin mənə nə qədər borcu olduğunu soruşdu. SMS hələ də telefonumda qalır. Təbii, cavab vermədim. Məhkəməyə də ilk öncə Cəfər Axundzadə və Nərgiz xanım gəldi”.
Ş.Cavanşir məhkəmə iclas bitdikdn sonra küçədə qarşı tərəfin təhqirinə məruz qaldığını da deyib.
“Məsələnin ən gülməli tərəfi odur ki, nə qədər borcları olduğunu soruşan adam məhkəmədə mənə borcu olmadığını dedi və əlində vərəqdən qəbzlər gətirmişdi. Bəzi adamlar xəbər göndərirlər ki, mənim ədavətim guya Cəfərlədir, gedim onu məhkəməyə verim. Məgər mən Cəfərlə müqavilə bağlamışam?! Mənim şəxsən onunla şəxsi zəmində ədavətim yoxdur. Mənim kiməsə borcum yoxdur ki, pulsuz ssenari yazım. Yaxud müqavilədə yazılmayıb ki, karantin olacaq, sel-daşqın olacaq, aylıq məvacibimiz ödənilməyəcək. 10 bölümlük ssenari istəyib, kollektiv olaraq 13 bölüm yazıb vermişik. Ssenarilər məndə var”, – Ş.Cavanşir vurğulayıb.
Onun sözlərinə görə, şirkətlə imzaladığı müqavilə üzrə cəmi iki dəfə ödəmə olub, onlar da kassa məxaric qəbzi ilə.
