Paytaxtın müxtəlif yerlərində “1 manat”, “nə alsan, 1 manata”, “ucuzluq” və buna bənzər adlar altında fəaliyyət göstərən dükanlar demək olar ki, çoxunuzun rastına çıxıb. Son vaxtlar isə bu mağazalarla bağlı şikayətlər çoxalmaqdadır. İnsanlar bildirir ki, əvvəllər bu mağazalarda mallar ucuz olurdusa, indi isə əksinə, məhsullar digər mağazalardan da baha satılır və insanların etimadından sui-istifadə edilir.
Musavat.com-un əməkdaşı olaraq belə mağazalardan birində olduq və deyilənlərin nə qədər doğru olub olmadığını araşdırdıq.
“Bu mağazalar açılanda malları ucuz qoyurdular, indi baxdım, o biri mağazalardan heç nə ilə fərqlənmir. Məcbur bir-iki vacib olanı aldım, çünki vaxtım azdır, amma bu nə dərəcədə düzgündür. Bunun adını niyə “1 manat” qoyublar ki?!”
Bu sözləri elə mağazanın qapısının ağzında rastlaşdığımız müştəri dedi.
İçəri daxil olub, qiymətlərlə maraqlananda alıcıların haqlı olduğunu görürük. Misal üçün, kiçik ölçülü qızılı rəngdə olan şamdanlar 4 manat 50 qəpiyə, balaca stolüstü saat 5 manat, balaca çayniklər 6 manat, adi şüşədən olan “kompot dəsti” 35 manata satılır. Şüşədən olan su qablar 2.50 qəpiyə, orta ölçülü yemək saxlama qablarının qiyməti isə 7 manata, 8 manat 50 qəpiyə, 10 manat arasında dəyişir. Orta ölçülü qapaqlı şüşə qəndqabılar 8 manata, orta ölçülü şüşə çayniklər isə 15 manata satılır. Dükanda bir manatlıq mal da görmək olur, amma bunlar məişətdə nadir hallarda istifadə olunan əşyalardır.
Satıcı ilə danışıb, malların niyə bu qədər baha olmasını, “1 manat” adının hansı məqsəd daşıdığını öyrənməyə çalışırıq. “Bəli, bu mağaza açılanda hər şeyi bir manata qoymuşduq. Amma o zaman bir manata olan malların qiyməti qalxıb. İndi nə edək, bağlayaq mağazanı?! İndi bütün malların qiyməti qalxıb da”.
“Bəs elədirsə, mağazanın adını niyə dəyişdirmirsiniz” sualına isə satıcı tutarlı cavab verə bilmədi.
İstehlakçıların hüquqlarının müdafiəçisi Eyyub Hüseynov mövzu ilə bağlı Musavat.com-a dedi ki, marketinq elminin istehlakçıları aldatmaq üçün çox sayda fırıldaqları var: “Bunlardan biri də istehlakçını qapıdan içəri salmaqdır. “Endirim faizi”, “1 manata”, “mağaza köçür”, “yerimizi dəyişirik” və sair kimi taktikalar işlədirlər. İstehlakçılar bilməlidirlər ki, onları aldatmaq onların aldadıldığını başa salmaqdan çox-çox asandır. Biz istehlakçı təşkilatı olaraq istehlakçıları başa salırıq ki, sizi bir çox məsələlərdə aldadırlar. O cümlədən də bu məsələdə. Bu, birmənalı şəkildə istehlakçıların aldadılmasıdır. Belə halda insanlar İqtisadiyyat Nazirliyinin “195 nömrə”sinə yığaraq məlumat verməlidir. İqtisadiyyat Nazirliyi əgər normal, effektli işləsə, biznesin tərəfin saxlamasa, həmin dükanı böyük miqdarda cərimə gözləyir. Lakin biz illər boyu bunu görmürük ki, istehlakçının hüququnu pozan tərəfi yalnız ona görə cərimə etsinlər”.
Afaq MİRAYİQ,
