Qədimdən bəri, ulularımızdan əmanət qalan Vətənimizi ana torpaq bilib, böyük məhəbbətlə sevərək müqəddəs bilmişik. Vətənini canı qədər sevən qəhrəman oğul və qızlarımız ana torpağının bir qarışı belə düşməndə qalmasın deyə, ölümün gözünə dik baxıb şəhadətə yüksəliblər. Belə oğulları xalq əbədi unutmur, onların xatirəsini əziz tutaraq tez-tez məzarlarını ziyarət edir, mövlud və anım günlərini elliklə qeyd edirlər. Növbəti mövlud günlərini andığımız igid oğullarımızdan Azərbaycanın Milli Qəhrəmanları Hacıyev Etibar Firuddin oğlu və Abdullayev Şövqiyar Cəmil oğludur.
Hacıyev Etibar Firuddin oğlu 1971-ci il aprel ayının 5-də Qərbi Azərbaycanın Vardenis rayonunun Zod kəndində anadan olub. Orta məktəbi bu kənddə bitirən Etibar 1988-ci ildə azərbaycanlıların Ermənistandan kütləvi şəkildə deportasiya edilməsi nəticəsində müvəqqəti olaraq ailəsi ilə birlikdə Kəlbəcər rayonunda məskunlaşıb. Hərbi xidmətə 1989-cu il iyun ayının 13-də çağırılan Qəhrəmanımız Perm şəhərində hərbi hissədə xidmətini edib. Xitmətini başa vurduqdan sonra ailəsinin məskunlaşdığı Xanlar (İndiki adı Göygöl) rayonuna qayıdır. Yurdsuzluğun həsrətini çəkən Etibar 1992-ci ildə könüllü olaraq Milli Orduya yazılaraq, torpaqlarımızın müdafiəsində canla-başla vuruşub. O, Böyük Canbar, Kiçik Canbar, Buzlaq, Erkəc kəndlərinin düşmən tapdağından azad edilməsində xüsusi fədakarlıq göstərib. Onun döyüş yolu Gülüstan kəndinə qədər uzanıb. 1992-ci il iyunun 15-də Goranboy rayonunda Ağcakənd kəndinin azad edilməsi uğrunda gedən döyüşdə qəhrəmancasına həlak olan Etibar Hacıyev Xanlar rayonunda Şəhidlər Xiyabanında dəfn edilib. Qəhrəmanımız subay idi. Azərbaycan Respublikası Prezidentinin 23 iyun 1992-ci il tarixli 6 saylı Fərmanı ilə Hacıyev Etibar Firuddin oğlu ölümündən sonra Azərbaycanın Milli Qəhrəmanı adına layiq görülmüşdür. Xanlar rayonunun Yeni Zod kəndindəki küçələrdən biri onun adını daşıyır.
Şövqiyar Abdullayev Cəmil oğlu 1969-cu il aprel ayının 5-də Qədim Göyçə mahalı Basarkeçər rayonunun Nərimanlı kəndində anadan olub. Nərimanlı kəndində orta məktəbə daxil olan Şövqiyar orta təhsilini 1986-cı ildə əla qiymətlərlə bitirərək Azərbaycan Politexnik İnstitutuna daxil olub. Birinci il ali təhsilini bitirəndən sonra hərbi xidmətə çağırılıb. Təhsilini yarım qoyaraq hərbi xidmətini etmək üçün Monqolustana yollanır. Şövqiyar hərbi hissələrin birində tank qoşunları tərkibində xidmətini başa vuraraq 1989-cu ildə Bakı şəhərinə qayıdır. O, 1992-ci ildə yeni yaradılan Milli Orduya yazılaraq, Ağdamda təşkil edilmiş tank briqadasına komandir təyin edilir. Tank briqadası ilə birlikdə Abdal Gülablı kəndini özünə mövqe seçən Şövqiyar Papravənd, Pircamal, Aranzəmin və digər kəndlər uğrunda ağır döyüşlərdə döyüşür. Gülablı kəndindən çıxarılaraq Ağdərəyə, Dranbon kəndinin müdafiəsinə kömək üçün göndərilən tank briqadası az vaxt içərisində Dranbon kəndini erməni-rus birləşmələrindən azad edir. Dranbon kəndi uğrunda gedən döyüşlərdə təkbaşına qalan Şövqiyar Abdullayevin tankı bir neçə dəfə vurulur, hər iki ayağından yaralanan qəhrəmanımız Ağdam hərbi hospitalına göndərilir. Müalicəni yarım qoyaraq Şövqiyar Abdullayev yenidən cəbhəyə qayıdır. 1992-ci il avqust ayının 27-də çox ağır döyüşdə öz yoldaşlarını əsir düşməkdən xilas edərkən vətənin igid oğlu ali məqama, şəhidlik zirvəsinə yüksəlir. 29 avqust 1992-ci ildə Bakının Şəhidlər xiyabanında dəfn edilir. Abdullayev Şövqiyar Cəmil oğlu Subay idi. O, ölümündən sonra Azərbaycan Respublikası Prezidentinin 5 fevral 1993-cü il tarixli 457 saylı fərmanı ilə “Azərbaycanın Milli Qəhrəmanı” adına layiq görülüb.
Səriyyə Salahova
