Hazırda intihar, çox mürəkkəb qlobal bir problemdir və bu bütün dünyanı narahat edən məsələdir. Ümumdünya Səhiyyə Təşkilatının (ÜST) məlumatına görə, dünyada hər il təxminən 800 000 insan intihar səbəbindən həyatını itirir, hər 40 saniyədən bir kimsə, həyatına qəsd edir və onların arasında kişilər, xüsusilə yeniyetmələr daha çoxdur.
Mövzu ilə bağlı BiG.AZ-a danışan psixoloq Fərqanə Mehmanqızı qeyd edib ki, intihar hallarına dünyanın bütün ölkələrində və müxtəlif yaş qruplarında rast gəlinir:
“Səbəblərə psixoloji, sosioloji, bioloji, ailə-məişət faktorları, genetik problemlərin olması kimi halları aid etmək olar.Lakin mən psixoloq kimi düşünürəm ki, intiharı aradan qaldırmaq üçün ümumiyyətlə bu haqda danışmamaq lazımdır. Çünki KİV-də və digər mətbuat yayınlarında nə qədər intihardan danışılırsa o qədər cəmiyyətimizdə intihara meyillilik artır. Uşaqlar valideyinlərini, ər-arvadını, dost-dostu intihar edəcəyi ilə bağlı şantaj edir. “.
Psixoloq bildirib ki, problemin həllinə gəlincəsə qeyd edim ki, intihar edən şəxsin psixologiyasını düzəltməyin elə bir müalicə yolu yoxdur:
“Özünə qapanan, asosial olan insanlar mütləq şəkildə psixoloqa və ya psixoterapevtə müraciət etməlidirlər. Əks təqdirdə bu problemdən qurtulmaq mümkün deyil”.
İntihara sürükləyəni hansı cəzalar gözləyir? Sualına isə cavab verən vəkil Turan Abdullazadə qeyd edib ki, insan hüquq və azadlıqları sistemində ən mühüm yer yaşamaq hüququna məxsusdur:
“Azərbaycan Respublikası Konstitusiyasının 27-ci maddəsi ilə hər kəsin yaşamaq hüququ və insanın qanunsuz olaraq həyatdan məhrum edilməsinin yolverilməzliyi təsbit edilmişdir.
“İnsan hüquqları haqqında Ümumi Bəyannamənin 3-cü maddəsinə əsasən, hər bir insan yaşamaq, azadlıq və şəxsi toxunulmazlıq hüququna malikdir. “Mülki və siyasi hüquqlar haqqında” Beynəlxalq Paktın 6.1-ci maddəsinə görə, yaşamaq hüququ hər bir insanın alınmaz hüququdur. Bu hüquq qanunla qorunur. Heç kim özbaşınalıqla həyatdan məhrum edilə bilməz.Azərbaycan Respublikası Cinayət Məcəlləsinin 125-ci maddəsinə əsasən təqsirkardan maddi, xidməti və ya sair cəhətdən asılı olmuş zərərçəkmiş şəxsi onunla amansız rəftar etmə, onun ləyaqətini mütəmadi olaraq alçaltma, ona hədə-qorxu gəlmə yolu ilə özünü öldürmə və ya özünü öldürməyə cəhd həddinə çatdırma- üç ildən yeddi ilədək müddətə azadlıqdan məhrum etmə ilə cəzalandırılır.
Azərbaycan Respublikası Cinayət Məcəlləsinin 125-ci maddəsinin mənasına görə, təqsirkardan maddi, xidməti və ya sair cəhətdən asılı olmuş zərərçəkmiş şəxsi onunla amansız rəftar etmə, onun ləyaqətini mütəmadi olaraq alçaltma, ona hədə-qorxu gəlmə yolu ilə özünü öldürmə və ya özünü öldürməyə cəhd həddinə çatdırma təqsirin birbaşa və ya dolayı qəsd formasında törədilir.
Yetkinlik yaşına çatmayanları özünü öldürməyə təhrik, sövq, təbliğ və ya köməklik etməyə görə daha ağır cinayət məsuliyyəti nəzərdə tutulmuşdur.
Bu cinayətə görə şəxsin təqsirlilik məsələsi həll edilərkən işin bütün faktiki halları hərtərəfli, tam və obyektiv araşdırılmalı, təqsirləndirilən şəxsin hərəkət və ya hərəkətsizliyinin nədə ifadə olunması, zərərçəkmişin təqsirləndirilən şəxsdən asılılığının forması göstərilməli və təqsirləndirilən şəxsin hərəkətləri ilə özünü öldürmə və ya ona cəhd arasında səbəbli əlaqənin mövcudluğu müəyyən edilməlidir”.
