İndiyədək Azərbaycanda utilizasiyaya verilmiş nəqliyyat vasitələrinin sayı məlum olub.
Bu barədə jurnalistlərə “Təmiz Şəhər” ASC-nin Nəqliyyat vasitələrinin utilizasiyalar şöbəsinin müdiri Mirzə Laçınov nəqliyyat vasitələrinin utilizasiyasının həyata keçirlidiyi məkana təşkil olunan mediatur zamanı məlumat verib.
Onun sözlərinə görə, indiyədək 40-a yaxın nəqliyyat vasitəsi utilizasiyaya verilib: “Artıq nəqliyyat vasitələrinin utilizasiyası prosesinə bu ilin noyabrından başlanılıb. Bununla bağlı xüsusi portal da istifadəyə verilib. Hazırda ölkəmizdə bir utilizator fəaliyyət göstərir. Bugünkü günə qədər 40-a yaxın nəqliyyat vasitəsi artıq utilizasiyaya qəbul edilib. 10-dan çox ərizəçiyə təsdiqedici sənədlər üzrə birdəfəlik ödənişlər həyata keçirilib”.
Qeyd edək ki, “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”na əsasən Azərbaycanda nəqliyyat vasitələrinin utilizasiyası proqramı hazırlanmış, həmçinin, proqramın tətbiqi ilə əlaqədar ümumilikdə 10-dan çox qanunvericilik aktına dəyişiklik və əlavələr edilib.
“Tullantılar haqqında” Azərbaycan Respublikasının Qanununun nəqliyyat vasitələrinin utilizasiyası ilə bağlı bu ilin sentyabr ayından qüvvəyə minmiş olan müddəalarına uyğun olaraq, ötən müddət ərzində “Təmiz Şəhər” ASC tərəfindən utilizatorların reyestrdə qeydiyyatı üçün tədbirlər görülüb.
Nəqliyyat vasitələrinin utilizasiyaya verilməsi könüllülük prinsipi əsasında həyata keçirilir və məcburi xarakter daşımır. Utilizasiyaya verilməzdən əvvəl nəqliyyat vasitəsi “Yol hərəkəti haqqında” Azərbaycan Respublikası Qanunu ilə müəyyən edilən qaydada dövlət qeydiyyatı üzrə daimi uçotdan çıxarılmalıdır.
Uçotdan çıxarıldıqdan və utilizatora təhvil verildikdən sonra nəqliyyat vasitəsini utilizatora təhvil verən şəxsə yerli istehsal yeni nəqliyyat vasitəsi almaq üçün güzəşt və ya birdəfəlik ödəniş hüququ verən təsdiqedici sənəd verilir. (Trend)
