2024-cü ildə qlobal reklam xərcləri ilk dəfə 1 trilyon dolları ötəcək.
ARANTV.AZ xəbər verir ki, bu, Böyük Britaniyanın WPP reklam konserninə məxsus GroupM agentliyinin hesabatında əksini tapıb.
Hesabata görə, bu, 2023-cü illə müqayisədə 9,5 faiz artım deməkdir ki, bu da iyun ayında dərc edilmiş əvvəlki proqnozdan yüksəkdir.
Agentlik qeyd edir ki, bu məbləğin yarıdan çoxunu Google, Meta, ByteDance Ltd(TikTok video xidmətinin sahibi), Amazon.com Inc. və Alibaba kimi texnologiya şirkətləri qazanacaq.
GroupM 2025-ci ildə reklam bazarının daha 7,7 faiz artaraq 1,1 trilyon dollara çatacağını proqnozlaşdırır. Artımın böyük hissəsi yenə də reklam agentlikləri kimi marketinq xidməti təminatçılarından deyil, ABŞ texnologiya sektorundakı ən böyük rəqəmsal reklam satıcılarından gələcək.
2025-ci ilin sonuna kimi rəqəmsal reklam ümumi reklam xərclərinin təxminən 73 faizini təşkil edəcək, 2024-cü ildə 12,4 faiz, 2025-ci ildə isə 10 faiz artacaq. Çap reklamı xərcləri bu il 4,5 faiz, gələn il isə daha 3 faiz azalacaq.
GroupM-in fikrincə, ən effektiv olaraq qalan televiziya reklamına çəkilən xərclər 2024-2029-cu illərdə artacaq. Lakin bu artım bütövlükdə reklam bazarının 6,4 faiz artımına qarşı illik cəmi təxminən 2,4 faiz olacaq.
Dünyanın ən böyük reklam bazarı olan Amerika reklam bazarı bu il 9 faiz (379 milyard dollara qədər), 2025-ci ildə isə 7 faiz artacaq. ABŞ-da siyasi reklam məlumatların müqayisəsi zamanı çaşdırıcı təsir göstərdiyinə görə proqnozlara daxil edilməyib. 2024-cü ildə siyasi reklam xərcləri 15,1 milyard dollar təşkil edib ki, bu da 2020-ci il prezident seçkilərindəkindən demək olar ki, üçdə bir qədər çoxdur.
Çində reklam xərclərinin 2024-cü ildə 13,5 faiz (204,5 milyard dollara qədər), gələn il isə 10,3 faiz artacağı gözlənilir. GroupM-in proqnozlarına görə, Avropada ən böyük olan Böyük Britaniya reklam bazarı bu il 8,3 faiz (53,2 milyard dollara qədər), 2025-ci ildə isə 7 faiz artacaq.
