Moskva saxta soyqırımı iddiasından ideoloji silah kimi istifadə edib
Ermənistanın baş naziri Nikol Paşinyan Sürixdə erməni icmasının nümayəndələri qarşısında çıxışında eyham vurub ki, Osmanlı İmperiyasında 1915-ci ildə erməni soyqırımı ilə bağlı yüz ildən artıqdır səslənən ittihamlar uydurma ola bilər və mövzunun özü də soyuq müharibə başlayandan sonra Moskvadan qaynaqlanıb. “Necə oldu ki, 1939-cu ildə ermənilərin “soyqırımı” gündəmdə olmayıb? Niyə bu gündəm 1950-ci ildə ortaya çıxdı? Niyə bu baş verdi? Bunu başa düşməliyik, ya yox? Biz bu mövzulara qarışmalıyıq, ya yox? Biz öz şəxsiyyətimizə nəzarət edirik, ya yox? Bunlar danışılmalı olan məsələlərdir. Bunlar bu problemləri həll etmək üçün anlamalı olduğumuz əsas suallardır. Biz öz tariximizi dərk etməliyik, kimliyimizi dərk etməliyik”, – Paşinyan bildirib. Beləliklə, Ermənistan lideri ilk dəfə olaraq “soyqırımı” mövzusunun Moskva tərəfindən geosiyasi kontekstdə İkinci Dünya müharibəsinin bitməsindən və “soyuq müharibə”nin başlanmasından, Türkiyənin Qərb blokuna qoşulmasından sonra istifadə olunduğuna açıq şəkildə işarə edib. Yəni SSRİ bu ideoloji silahı kamalist Türkiyəyə qarşı istifadə edib.
Ermənistanın baş nazirinin Sürixdə erməni diasporu qarşısında çıxışı zamanı Moskvanın siyasi laboratoriyalarında “soyqırımı nəzəriyyəsi” ilə bağlı tezislərini hazırlaması Ankara ilə münasibətlərin normallaşdırılması istiqamətində israrlı səylərin davamı kimi də qiymətləndirilə bilər. Məlum olduğu kimi, Ermənistan 2021-ci ildən Türkiyə ilə heç bir ilkin şərt, o cümlədən “soyqırımı”nın tanınması və ya bu mövzunun hər hansı formada müzakirəsi olmadan əlaqələr qurmağa çalışır.
Paşinyanın bu açıqlaması müxalifət tərəfindən sərt şəkildə tənqid edilib. Kremlə yaxın Rusiya Erməniləri Birliyi Paşinyanı “sübut edilmiş soyqırımı faktını şübhə altına almaqda” ittiham edən bəyanat yayıb.
Nikol Paşinyan Rusiyaya qarşı olduğu üçün belə deyir, yoxsa Moskva həqiqətən də bu uydurmadan Türkiyəyə qarşı istifadə etmək üçün istifadə edib?
Mütəllim Rəhimli
Ədalət Partiyasının sədr müavini Mütəllim Rəhimli “Yeni Müsavat”a şərhində bildirdi ki, Nikol Paşinyan xülyalarla yaşayan Ermənistanı reallıqlarla barışmağa çağırır, buna doğru aparır: “Onun bütün hərəkətləri və siyasəti ona yönəlib ki, erməniləri uydurma iddialardan cəkindirsin. Ermənistan və dünya erməniləri uzun müddətdir uydurma erməni soyqırımı ilə dünyada özlərini məzlum, yazıq xalq kimi göstərməyə çalışır. Onlar bundan istifadə edərək bir sıra güzəştlər, maliyyə yardımları və iqtisadi, siyasi dəstək əldə ediblər. Həm də bu iddiaları supergüclərin əlində zaman-zaman Azərbaycana və Türkiyəyə qarşı bir təhdid vasitəsi kimi istifadə olunub. Lakin uydurma soyqırımı iddiaları Ermənistana önəmli bir qazanc gətirməyib. Əvəzində qonşularla düşmən münasibət formalaşıb. Ermənistanı Avropa Birliyinə sürükləyən Nikol Paşinyan ölkəsinin başına gətirilən bəlaların həqiqi səbəblərini də deməyə başlayıb. Paşinyanın dedikləri tarixi faktlara əsaslanır. Belə ki, Rusiya cənub sərhədində ozünün təhlükəsizlik buferi kimi həmişə Ermənistanı görüb. Əsas təhlükənin isə türklərdən gəldiyini və ona qarşı Ermənistanı bir dövlət kimi formalaşdırdığını və qoruduğunu hər kəs bilir. Ona görə də uydurma soyqırımı ifadəsinin dünyada zorakılığı təmsil edən, “Parçala, hökm elə!” şüarını əsas prioriteti hesab edən Rusiyanın məqsədyönlü ideyası olması inandırıcıdır. Rusiya uydurma “erməni soyqırımı” məsələsini bilərəkdən Türkiyəyə qarşı istifadə etmək üçün gündəmə ermənilərin əli ilə daşıyıb. Bunu ermənilər daha yaxşı bilər və bu ölkənin arxivləri təsdiq edə bilər ki, uydurma soyqırımı iddiası kim tərəfindən ortaya atılib. Nikol Paşinyanın dediklərinin kifayət qədər əsası var. Əks halda, o, Rusiyaya qarşı belə bir iddianı səsləndirməzdi”.
Ekspert hesab edir ki, Nikol Paşinyanın bu fikirləri daha çox Ermənistanı və erməniləri həqiqətlə yaşamağa öyrətmək, həm də inkişafa yönəltməyə xidmət edir: “O, Ermənistanın həqiqi dostunun və düşməninin indiyədək doğru-düzgün muəyyənləşdirilmədiyini bildirməyə də çalışır. Təbii ki, bu zaman Rusiyanın Cənubi Qafqazdakı oyunlarının mahiyyəti də üzə çıxır. Rusiya ifşa olunmasa, Paşinyan Ermənistanı Avropa Birliyinə daşıya bilməyəcəyini başa düşür. Ona görə də vaxtaşırı olaraq həqiqətləri söyləyir. Bununla bağlı ölkəsinin arxivində olan tarixi mənbələrin də üzə çıxarılmasını təmin etsəydi, daha yaxşı olardı”.
