“Quzu əti həmin məlumatı açıqlayan ekspertlərin başında duranların, xalqın pulunu yeyən məmurların qarnındadır”.
Bunu aparıcı Tarix Əliyev (Tolik) paylaşımında bildirib.
Tolik kənd təsərrüfatı üzrə ekspertləri hədəfə alıb. O, ölkədə quzu ətindən daha çox istifadə edildiyi və buna görə xırdabuynuzlu heyvanların sayında kəskin azalma müşahidə olunduğunu iddia edənləri tənqid edib.
“Instagram”da yayımladığı videoda Tolik fikirlərini belə ifadə edib:
“Bu gün yenə xalqı qıcıqlandıran bir məlumat yayılıb ki, guya insanlar o qədər varlıdırlar ki, yalnız quzu əti yeyirlər. Buna görə də quzuları 6 aylıq olmamış kəsirlər. Guya camaat bu əti alır, ona görə də artım yoxdur.
Məncə, elə quzu əti həmin məlumatı açıqlayan eksperlərin başında duranların, xalqın pulunu yeyən məmurların qarnındadır. Bizim xalq qənaətcildir, qoyun-quzu ətini də ayda bir dəfə alır.
Ola bilər, dediklərinizdə həqiqət var, amma bunu ümumiyyətlə xalqa yox, bir çox şadlıq evlərinə, qarnı burunlarına deyən məmurlara söyləyin ki, bir az quzu ətindən az yesinlər, heç nə olmaz. Özünüzü söydürməyin. Elə ailələr var ki, aylarla quzu əti almır. Qoyun, mal ətini ayda bir dəfə ala bilərlər, amma quzu ətini bilirsiniz kimlər yeyir. Açıqlama verəndə deyin ki, imkanı olan yuxarı təbəqə nümayəndələri quzu əti yediyinə görə qoyun artımında problem yaranıb”.
Tarix Əliyev əlavə edib: “Bəzi kənd təsərrüfatı ekspertlərinin bugünkü açıqlamaları doğrudan da təəccüblüdür. Məncə, Azərbaycan xalqı elə bir rifah içində yaşasın ki, qoyun ətindən çox quzu ətinə tələbat olsun. Amma bilinir ki, quzu ətinin qiyməti çox bahadır, xüsusilə sümüksüz quzu əti daha da bahalıdır. Orta gəlirli insanlar və ya bölgələrdə yaşayanlar üçün ayda bir neçə dəfə quzu əti almaq çətindir. Maraqlıdır, bu quzu ətini daha çox kimlər alır?” (Yenisabah.az)
