“Putin işğal olunmuş əraziləri geri qaytarmayacaq” – Səudiyyə görüşü hansı nəticələrlə bitəcək?
Fevralın 18-də Səudiyyə Ərəbistanında ABŞ və Rusiya nümayəndə heyətlərinin Ukrayna böhranının həllinə həsr olunmuş görüşü keçiriləcək.
Məlumata görə, ABŞ və Rusiyanın yüksək səviyyəli nümayəndələri iki ölkənin prezidentləri Donald Tramp və Vladimir Putin arasında danışıqlara hazırlıq məsələlərini də müzakirə edəcəklər. Bundan əvvəl ABŞ liderinin Yaxın Şərq üzrə xüsusi nümayəndəsi Stiven Vitkoff fevralın 16-da axşam saatlarında ABŞ nümayəndə heyətinin tərkibində Rusiya ilə danışıqlar üçün Səudiyyə Ərəbistanına gedəcəyini və Ukrayna münaqişəsinin həllində ciddi irəliləyiş gözlədiyini bildirmişdi.
“Bloomberg” də öz növbəsində qeyd edib ki, görüşdə Trampın milli təhlükəsizlik üzrə müşaviri Mayk Vals da iştirak edəcək.
Fevralın 12-də Rusiya prezidenti ilə Amerika lideri arasında telefon danışığı olub. Onlar Ukraynada döyüşlərin dayandırılması məsələsini, ikitərəfli münasibətləri və bir sıra digər mövzuları müzakirə ediblər, həmçinin təmasları davam etdirmək və şəxsi görüş təşkil etmək barədə razılığa gəliblər.
Mövzu ilə bağlı Musavat.com-a danışan politoloq Tofiq Abbasov deyib ki, danışıqlar üçün Səudiyyə Ərəbistanının seçilməsi təsadüfü deyil.
Onun sözlərinə görə, Səudiyyə Ərəbistanı ABŞ-a yaxın dövlətdir və Respublikaçılar Partiyası ilə münasibətləri etibarlı şəkildə möhkəm olub:
“Ümumi qəbul edilmiş standartları qətiyyətlə sındıran Donald Tramp gözəl bilir ki, Səudiyyə Ərəbistanının Rusiya ilə çox yaxşı münasibəti var. Yəni hər iki ölkə üçün qəbul edilən bir aktordur. Ona görə də oranı danışıqlar meydanı kimi seçiblər. Burada əsas müzakirə post müharibə dövrünün tərtib olunmasıdır. Ümumiyyətlə, o, hansı məramları özündə ehtiva etməlidir, Ukraynaya hansı ərazilər qalacaq və s. Əsas məsələ odur ki, müharibə dayanmalıdır. Vaşinqton və Moskva bu məsələ ilə bağlı konsensus tapdılar. Hər iki dövlətin rəhbəri qarşıdurma meylindən geri çəkilərək əməkdaşlıq cərəyanını gündəmə gətirir. Tramp müharibələrin əleyhinədir, düşünür ki, Rusiya ilə birlikdə yeni dünya nizamını formalaşdıra bilər. Bu, əslində ən doğru yanaşmadır. Həqiqətən də dünya birliyi müharibələrdən, konfliktlərdən yorulub. Münaqişəli vəziyyətlərin sayı həddindən artıq çoxdur. Bütün müharibələrin bir sonu olmalıdır. Bu son isə müasir dövrümüzdə əlçatmaz bir məsələyə çevrilib. Buna görə də Putin və Tramp çalışacaqlar qətiyyətli qərar versinlər ki, müharibə dayandırılsın. Bu baxımdan hesab edirəm ki, Rusiya işğal etdiyi 14 faiz Ukrayna torpaqlarını qaytarmayacaq. Faktiki olaraq Tramp da buna işarə edir ki, əlinizi bu torpaqlardan üzün.
Ukrayna prezidenti isə artıq sıradan çıxarılıb. O, Səudiyyə Ərəbistanına bərabər hüquqlu tərəfdaş kimi getmir. Orada iştirakçılar Donald Tramp və Vladimir Putindir.
Zelenskinin bu danışıqlarda hansısa bir hüququ və səlahiyyəti yoxdur. Putin Zelenskini qəbul etmir və bildirir ki, onun prezident səlahiyyətləri xeyli müddət əvvəl bitib, müharibə vəziyyətindən sui-istifadə edib, statusunu saxlamaq istəyir. Buna görə də Zelenski Səudiyyə Ərəbistanında dinləyici statusunda olacaq”.
