Gündəlik alış-veriş zamanı alınan məhsulları yığmaq üçün tez-tez istifadə edilən sellofan torbalara görə artıq neçə müddətdir ki, əlavə ödəniş tələb olunur. Bu, Nazirlər Kabinetinin 2021-ci il 2 fevral tarixli 25 nömrəli qərarında öz təsdiqini tapıb.
Belə ki, ölçüsü 15-50 mikron olan polietilen torbalar, ayrıca məhsul növü kimi pulla satılır. Bu qərar ona görə verilmişdi ki, kağız paketə keçirilsin. Amma qərardan 4 il ötür və marketlərdə kağız torbalar verilmir, əksinə, sellofanlar satılır, mağazalar pul qazanır.
Eyyub Hüseynov
Azad İstehlakçılar Birliyinin sədri Eyyub Hüseynov “Yeni Müsavat” a şərhində bildirdi ki, sellofan torbaların satışının məhdudlaşdırılması ilə bağlı birlik daim çağırışlar edib, təkliflər irəli sürüb: “Biz təklif etmişdik ki, ən azı MDB məkanındakı təcrübəyə istinad olunsun, sellofan torbalar əhaliyə satılsın. O cümlədən sellofan torbaların rəngsiz, tam şəffaf olmasını da təklif etmişik. Lakin nəticədə Nazirlər Kabinetinin bəzi qərarları kimi, bu qərar da mükəmməl icra olunmadı: alternativlər təklif edilmədi, istehsalçılar tapılmadı, o cümlədən hələ də qablaşdırmalarda plastikdən istifadə olunur. Azad İstehlakçılar Birliyi qrant layihəsi çərçivəsində 2023-cü ildə bez torbalar hazırladı və əhaliyə pulsuz payladı. Biz daim bazar torbalarından istifadəni təşviq etmişik. Üstəlik, sənaye malları satışı yerlərində daha qalın torbalar yenə də istifadə olunur, ətraf mühitə atılır və yığılmır. Odur ki, belə qərarlar qəbul edəndə alternativ variantlar düşünmək lazımdır. Əhalinin sellofan torbalardan istifadəsi azalsa da, əsas hədəfə nail ola bilməmişik. Sellofan torbaların pulla satılması nəticəsində əhalinin bu növ torbalardan istifadəsi təxminən 40 faiz azalıb”.
E.Hüseynov rəngli torbaların zərərlərindən də danışdı: “Hələ də rəngli sellofan torbalar istifadə olunur. Bu növ torbalar evlərə ağır metalları daşıyır. İstənilən rəngin içərisində ağır metallar, məsələn qurğuşun var. Qurğuşun isə əhalinin tədricən zəhərlənməsinə və ətraf mühitin çirklənməsinə gətirib çıxarır”.
