Qadağaya əməl etməyənlər min manatdan dörd min manatadək məbləğdə cərimə ediləcək
1 led lampasının istifadə müddəti boyunca 10-dan çox közərmə lampası xarab olur. Bunu Milli Məclisin Təbii ehtiyatlar, energetika və ekologiya komitəsində keçirilən “Enerji səmərəliliyi: nəticələr və gözləntilər” mövzusunda ictimai müzakirədə energetika nazirinin müavini Elnur Soltanov deyib.
Nazir müavini qeyd edib ki, istehlakçı bunu görmür, qısamüddətli hesablama aparır: “Buna görə inzibati müdaxiləyə ehtiyac yaranır. 1 led lampası 6 manatdır, 1 közərmə lampası 60 qəpikdir. Amma vətəndaş uzunmüddətli hesablama aparmır. Buna görə biz müdaxilə etməyə qərar vermişik. Bu müdaxilənin nəticəsi 1 ildə 30 milyon kub metr qaza qənaət, yəni Naxçıvanın 2 ay qazla təmin olunması deməkdir”.
Qeyd edək ki, İnzibati Xətalar Məcəlləsinə təklif edilən dəyişikliyə əsasən, 25 Vt və daha yuxarı gücə malik olan elektrik közərmə lampalarının idxalına, istehsalına və ya satışına görə vəzifəli şəxslər min manatdan min beş yüz manatadək məbləğdə, hüquqi şəxslər üç min manatdan dörd min manatadək məbləğdə cərimə ediləcək.
Qanun qəbul ediləcəyi təqdirdə 60 Vt və daha yuxarı gücə malik olan közərmə lampalarına münasibətdə 2026-cı il yanvarın 1-dən, 25 Vt-dan (25 Vt daxil olmaqla) 60 Vt-a qədər gücə malik olan közərmə lampalarına münasibətdə 2026-cı il iyulun 1-dən qüvvəyə minəcək.
Bəs bu qadağanın hansı iqtisadi tərəfləri var?
Mövzu ilə bağlı iqtisadçı Eyyub Kərimli “Yeni Müsavat”a deyib ki, bu qərar neçə istiqamətdə iqtisadiyyata müsbət təsir göstərəcək: “İlk növbədə, bu addım elektrik enerjisinə qənaət edəcək. Bu isə həm təsərrüfat subyektləri, həm də əhali üçün müsbət haldır. Digər tərəfdən, enerji istehsalında istifadə ediləcək qaz və ya neft ehtiyatlarının sərfiyyatını azaldacaq. Üçüncü mühüm məqam isə artıq enerji resurslarının ixrac imkanlarını genişləndirməkdir.
Bu baxımdan, hesab edirəm ki, közərmə lampaları beynəlxalq təcrübədə çoxdan istifadədən çıxarılıb. Çünki onlar həm təhlükə törədir – qızma, partlama, həddindən artıq istilik yayma kimi risklər yaradır – həm də enerjinin həddindən artıq istehlakına səbəb olur.
Sadə müqayisə aparsaq, baxmayaraq ki, közərmə lampalarının qiyməti ucuzdur, uzunmüddətli perspektivdə onların istehlak etdiyi elektrik enerjisi daha yüksək xərcə gətirib çıxarır. Digər tərəfdən, dünya inkişaf edir, yeni texnologiyalar meydana çıxır. Vaxtilə bu lampalar İliç lampası adlanırdı, amma texnologiya dəyişdikcə daha təhlükəsiz, enerjiyə qənaətcil və daha güclü işıq saçan cihazlar istehsal olunur”.
