“Xəbərdarlıq və məzəmmət tənbeh növü sayılmır. Tənbeh inzibati məsuliyyət yaradır. Cəza isə cinayət məsuliyyəti yaradır”.
Bu sözləri “Yeni Sabah”a hüquqşünas və ehtiyatda olan polkovnik Şəmsəddin Əliyev bildirib.
Qeyd edək ki, prezident İlham Əliyev Dövlət Turizm Agentliyinin sədri Fuad Nağıyevə şiddətli töhmət elan edilib. O, işində yol verdiyi nöqsanlara görə cəzalandırılıb. Ölkə başçısı daha öncə 2020-ci ilin aprelində İsmayıllı Rayon İcra Hakimiyyətinin başçısı Nahid Bağırova 2024-cü ilin oktyabrında isə “Azərenerji” ASC-nin prezidenti Balababa Rzayevə də töhmət elan edib.
Ş. Əliyev rəsmilərə verilmiş bu tənbehlər əsasında onların mənasına aydınlıq gətirib.
O qeyd edib ki, vəzifəsindən asılı olmayaraq, işçi özünün əmək funksiyalarını və öhdəlikləri yerinə yetirmədikdə işdən azad edilə bilər:
“İşəgötürən işçiyə töhmət, sonuncu xəbərdarlıq şiddətli töhmət verə bilər. Əgər kollektiv müqavilədə aylıq əməkhaqqından tutulması ilə bağlı razılaşma varsa, həmin işçinin əməkhaqqının 1/4 -i məbləğindən çox olmamaq şərti ilə, cərimə tətbiq edilə bilər.
İşçi əgər özünün əmək funksiyasını və əmək müqaviləsi üzrə öhdəliklərini yerinə yetirmədikdə, rəhbərlik onunla əməkdaşlığı ləğv edə bilər.
Xəbərdarlıq və məzəmmət tənbeh növü sayılmır. Tənbeh inzibati məsuliyyət yaradır. Cəza isə cinayət məsuliyyəti yaradır. Əmək qanunvericiliyinə görə, işəgötürən intizam tənbehini verərkən, işçinin şəxsiyyətini, kollektivdəki ictimai nüfuzunu, peşəkarlığını mütləq şəkildə nəzərə almalıdır.
İntizam tənbehi işçiyə yalnız onu işə götürən, əmək müqaviləsi bağlayan, onun şərtlərini dəyişdirmək ixtiyarında olan işəgötürən tərəfindən verilə bilər. Doğrudur, işəgötürən bu səlahiyyəti öz müavininə verə bilər, amma burada tənbehin verilməsi qaydaları ilə bağlı da şərtlər var”.
Hüquqşünas qeyd edib ki, intizam tənbehləri 6 ay sonra qüvvəsini itirir:
“İntizam tənbehi işçi tərəfindən əmək və icra intizamını pozulması aşkar edildiyi gündən 1 ay keçənədək verilə bilər. İşçinin xəstə olduğu yaxud ezamiyyətdə, məzuniyyətdə olduğu vaxt bu müddətə daxil edilmir. Yəni işçi məzuniyyətdə, ezamiyyətdə olanda və ya xəstəxanada yatdığı müddət ərzində müdiriyyət ona hər hansı bir intizam tənbehi tətbiq edə bilməz. İntizam tənbehinin verildiyi müddət 6 aydır. Bu müddətdən sonra tənbeh artıq qüvvəsini itirir. Həmçinin vaxtından öncə də intizam tənbehi işçinin üzərindən götürülə bilər”.
