Beynəlxalq Münasibətlərin Təhlili Mərkəzinin xarici siyasət şöbəsinin müdiri Cavid Vəliyevə yeni vəzifə verilib.
ARANTV.AZ xəbər verir ki, Azərbaycan Respublikası Prezidenti İlham Əliyevin 2025-ci il 7 mart tarixli sərəncamı ilə Cavid İ. Vəliyev Beynəlxalq Münasibətlərin Təhlili Mərkəzinin İdarə Heyətinin üzvü təyin edilib.
Qeyd edək ki, Cavid Vəliyev Egey Univesitetinin jurnalistika fakültəsinin məzunudur. 2002-ci ildə Egey Universitetini bitirərək, dövlət xətti ilə Türkiyənin Qazi Universitetinin Beynəlxalq Münasibətlər fakültəsinin magistratura proqramına, 2006-cı ildə isə Ankara Universitetinin beynəlxalq münasibətlər fakültəsinin doktorantura proqramına daxil olub.
2005–2009-cu illərdə Ankara şəhərində müstəqil fəaliyyət göstərən Türkiyə Milli Təhlükəsizlik Strateji Araşdırma Mərkəzində elmi işçi, daha sonra isə Cənubi Qafqaz şöbəsinin müdiri işləyib. 2012-ci ildə Ankara Universitetindən beynəlxalq münasibətlər üzrə fəlsəfə elmləri doktoru alimlik dərəcəsini alıb. 2010-cu ildən etibarən Azərbaycan Respublikasının Prezidenti yanında Strateji Araşdırma Mərkəzində (SAM) aparıcı elmi işçi, baş elmi işçi və 2015-ci ildən etibarən Xarici siyasət məsələlərinin təhlili şöbəsinin müdiri vəzifəsində işləyib.
2017-ci ildən etibarən ingilis dilində nəşr olunan Caucasus International jurnalının baş redaktorudur. 2019-cu ilin iyul ayından etibarən Beynəlxalq Münasibətlər Təhlili Mərkəzinin xarici siyasət şöbəsinin müdiri vəzifəsində fəaliyyət göstərir.
2017-ci ildə Azərbaycan Respublikasının Prezidenti tərəfindən ölkənin ictimai-siyasi həyatında səmərəli fəaliyyətlərinə görə “Tərəqqi” medalı ilə, həmçinin, Azərbaycan Respublikasının Prezidentinin 2019-cu il 25 iyul tarixli sərəncamı ilə “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif olunub.
