Menyu qiymətləri dəyişməz qalıb, ancaq xərclər artıb, qazanc azalıb
Mübarək Ramazan ayı bitdi. Artıq aprelin 1-dən Azərbaycanda toy-nişan mərasimlərinə yenidən start verilib. Ənənəvi olaraq, Ramazan ayından sonra müzakirə olunan məsələlərdən biri restoranlarda, şadlıq saraylarında qiymətlərin artıb-artmayacağıdır.
“Yeni Müsavat”ın əməkdaşı bir neçə şadlıq sarayı ilə əlaqə saxlayıb, vəziyyəti öyrənib.
“Monte Karlo” sarayının baş inzibatçısı Kənan Camalov “Yeni Müsavat”a açıqlamasında bildirdi ki, qiymətlərdə artım yoxdur: “Keçən ilin bayram sonrası vəziyyəti ilə müqayisədə toyların sayı azdır. Məhsulların qiymətində ciddi artım olsa da, menyuların qiymətində artım edə bilmirik. Bu da şadlıq saraylarının sayının çox olması ilə deyil, toyların sayının az olması ilə əlaqədardır. Bizdə menyunun qiyməti 60 manatdan başlayır. Qonaq sayına görə endirim edirik. Qiymətlər 60-70-80 manat arasında dəyişir. Bu da yemək, içki, balıq məhsullarının çeşidindən asılıdır. Müştərilərə standart qiymət demirik, qonaq sayına görə endirimlər olur. Hazırda qiymət artımı nəzərdə tutulmur. Əvvəllər menyunu 60 AZN-ə təklif edib, qiymətdə güzəştə gedə bilirdik, indi isə 60 AZN deyib, güzəşt edə bilmirik. Əvvəllər 5-10 manat endirim edə bilirdik, indi isə 2-3 manat. Belə deyək, qazancımız endirim üzərindəndir”.
“Altun” sarayın baş inzibatçısı Əli Qasımov da bildirdi ki, toyların sayı ötən ilə nisbətən azdır: “Durğunluq var, amma səbəbini bilmirik. Ümumiyyətlə, son illər toyların sayında azalma var. Şadlıq saraylarının sayının çox olması əsas səbəb deyil. Əvvəlki illərlə müqayisədə vəziyyət ürəkaçan deyil. Menyu qiymətləri 40 AZN-dən başlayır. Endirim isə qonaq sayından asılıdır”.
“Kolizey” şadlıq sarayının inzibatçısı da qeyd etdi ki, toyların sayında ciddi azalma müşahidə olunur: “Keçən ilin aprel ayında 20 gündə 10-12 toy təşkil olunmuşdu. Bu il isə məclislər banket zallarında keçiriləcək. Menyuda heç bir dəyişiklik etməmişik, əksinə, qiymətləri aşağı təklif edirik. Heç gözləmədiyimiz haldır. Menyu qiyməti 40 AZN-dən başlayır. Müştərilər isə daha aşağı qiymət istəyirlər. Endirim qalsın qırağa, zəng edənlər də azalıb. Bahalaşmanı nəzərə alsaq, bu gün şadlıq sarayları menyu qiymətlərini ən azı 50 AZN-dən təklif etməlidir. Amma bu, tələbatla uyğun gəlmir. Pandemiyadan sonra şadlıq saraylarında qonaq sayında da ciddi azalma var. Vaxt var idi ki, 300-350 nəfərlik zala 200 nəfərdən az qonaq qəbul etmirdik. İndi isə 100 nəfərlik məclislər belə azdır, bu isə xərcləri qarşılamır. Müəyyən qədər işçilərin maaşsız qalmaması üçün çalışırıq. İş olmasa, işçi də gəlməyəcək. Əvvəllər ən azı 70 nəfər işlədə bilirdik, indi isə ixtisarlar var”.
Xalid Kərimli
İqtisadçı Xalid Kərimli “Yeni Müsavat”a açıqlamasında vurğuladı ki, sahibkarların xərcləri artdığı üçün qiymət artımı müşahidə oluna bilər: “Dövlət Statistika Komitəsinin məlumatına görə, meyvə-tərəvəzin qiyməti ötən ilin müvafiq dövrü ilə müqayisədə artıb, ət də bir qədər bahalaşıb. Bahalaşmanın əsas səbəblərindən biri Tarif Şurasının dizelin qiymətini qaldırmasıdır. Dizelin qiymətinin 25 faiz artması sahibkarların xərclərinə çox böyük təsir göstərir. Bundan başqa, yanvar ayından etibarən elektrik enerjisi və təbii qazın yeni tarifləri müəyyən edilib. Eyni zamanda bu ilin yanvar ayından minimum əmək haqqının 16 faiz artırıldığı bildirilib. Ötən il orta aylıq əməkhaqqı 8 faiz artıb. Minimum əməkhaqqının artması ən çox aşağı təbəqələrə təsir edir. İndiki məqamda restoran və iaşə xidmətlərinin qiymət artımına gedə biləcəyini düşünmürəm. Bu amillər sahibkarların xərclərinin artmasına səbəb olur. Amma qiymət artımı üçün təzyiq davam edəcək. Sahibkarlar kütləvi şəkildə olmasa da, müştəriləri qaçırmamaq üçün selektiv şəkildə artımlar edə bilərlər. Hazırda qiymət artımı üçün xüsusi səbəb yoxdur”.
