Tez-tez vətəndaşlar tərəfindən doğum haqqında şəhadətnamədə ad, soyad və ya ata adı ilə bağlı səhvlərə yol verilməsi ilə bağlı şikayətlər səsləndirilir.
Bu səhvlər isə sonradan böyük problemlərə yol aça bilir.
Əsl adı Ramin olan vətəndaşlardan biri soyadını dəyişdirmək üçün “ASAN Xidmət” mərkəzinə müraciət edəndə adının bir hərfinin (Ramil) sistemə səhv yazılması ona çətinlik yaradıb.
Belə ki, vaxtilə kağız üzərində adında edilən səhv düzəldilsə də, bu, rəsmi olaraq sistemdə dəyişdirilməyib.
Fərqli situasiya, lakin bənzər hadisələrdən biri Xalid Quliyev adlı vətəndaşın 6 yaşlı övladı Malikin başına gəlib. 6 yaşlı Malik doğum evində ana adının səhv qeyd edilməsinə görə doğum haqqında şəhadətnamə ala bilmir, məktəb üçün isə qeydiyyata düşməkdə çətinlik yaşayır.
Maraqlıdır, bəs görəsən, bu hal ilə qarşılaşan vətəndaşlar nə etməlidirlər?
Məsələ ilə bağlı Oxu.Az-ın suallarını cavablandıran hüquqşünas Mircəlal Muradlı bildirib ki, vətəndaş doğum haqqında şəhadətnamədə edilən yanlışlığın düzəldilməsi üçün şəhadətnaməni verən Azərbaycan Respublikasının Ədliyyə Nazirliyinin Qeydiyyat Şöbəsinə müraciət etməlidir:
“Qeydiyyat Şöbəsi təqdim edilən şəhadətnamədə mövcud olan yanlışlıqların aradan qaldırılmasından ötrü Azərbaycan Respublikası Əhalisinin Dövlət Reyestri Xidmətinə müvafiq şəxsin adındakı yanlışlığın düzəldilməsinə dair elektron bildirişi göndərməlidir. Müvafiq elektron bildiriş Dövlət Reyestrində qeydə alındıqdan sonra vətəndaşa yeni doğum haqqında şəhadətnamə verilir.
Vətəndaşın qarşılaşdığı problemin həlli üçün onun yeni doğum haqqında şəhadətnaməsini dəyişdirməyinə ehtiyac yoxdur. Qeyd olunduğu kimi, bütün sənədlərdə adının Ramin getməsi, yalnız “ASAN Xidmət” mərkəzi tərəfindən sistemdə adının Ramil olaraq bildirilməsi onu deməyə əsas verir ki, vətəndaşa adında düzəliş edildikdən sonra yeni doğum haqqında şəhadətnamə verildiyi zaman Qeydiyyat Şöbəsi tərəfindən Azərbaycan Respublikası Əhalisinin Dövlət Reyestri Xidmətinə müvafiq (şəxsin adındakı yanlışlığın düzəldilməsinə dair) elektron bildiriş göndərilməmişdir. Vətəndaş həmin şəhadətnaməni aldığı Qeydiyyat Şöbəsinə müraciət edərək müvafiq elektron bildirişin göndərilməsini rəsmi formada tələb etməyi tövsiyə edirəm. Vətəndaşın müraciəti müsbət nəticələnmədiyi və ya Qeydiyyat Şöbəsi tərəfindən hərəkətsiz qaldığı təqdirdə inzibati məhkəməyə müraciət edə bilər”.
Mircəlal Muradlı 6 yaşlı uşağın ana adında doğum evində səhvliyə yol verilməsi məsələsinə aydınlıq gətirərək bildirib ki, vətəndaş doğum haqqında verilmiş tibbi şəhadətnaməni Ədliyyə Nazirliyinin Qeydiyyat Şöbəsinə ərizə ilə birlikdə təqdim edərək səhvə yol verildiyini qeyd etməlidir:
“Qeydiyyat Şöbəsi vətəndaşın ərizəsi əsasında doğumu qeydə alınmış xəstəxanaya rəsmi sorğu verir, xəstəxana tərəfindən müvafiq araşdırma aparıldıqdan sonra müvafiq tibbi şəhadətnamədə ana adına yazılmış yanlışlıqları düzəldərək yeni doğum haqqında tibbi şəhadətnamə ilə yanaşı ana adının düzəldilməsinə dair müvafiq arayışı qeydiyyat şöbəsinə təqdim edir. Qeydiyyat Şöbəsi də bundan sonra doğum haqqında şəhadətnamə verərək vətəndaşı gecikmiş doğumlar siyahısına əlavə edərək Azərbaycan Respublikası Əhalisinin Dövlət Reyestri Xidmətinə müvafiq elektron bildirişi göndərir. Qeyd edirəm ki, Qeydiyyat Şöbələrinin vəzifələrindən biri də vətəndaşlıq vəziyyəti aktlarının dövlət qeydiyyatına alınması ilə bağlı fiziki şəxslərə hüquqi yardım göstərməkdir”.
Hüquqşünas Sevinc Rəhimova əlavə olaraq bildirib ki, doğum haqqında şəhadətnamədə hər hansı dəyişiklik edilərsə, vətəndaşın bütün sənədləri dəyişdirilməlidir:
“Ad, soyad, ata adı və s. kimi dəyişikliklərin edilməsi üçün vətəndaş ilk növbədə Ədliyyə Nazirliyinin Qeydiyyat Şöbəsinə və ya “ASAN Xidmət” mərkəzinə müraciət edir. Müraciətə əsasında 3-6 ay ərzində dəyişiklik edilir. Dəyişiklik edilmədiyi təqdirdə isə imtina sənədi verilir. Vətəndaş bu imtina sənədini aldıqdan sonra məhkəməyə müraciət edir. İmtina sənədi verilmədən vətəndaş məhkəməyə müraciət edə bilməz. Məhkəmə şahidləri dindirir, sorğular əsasında qərar verir. Qəbul olunan qərar Ədliyyə Nazirliyinə göndəriləcək, lazımı prosedurlar iş icra olunacaq”.
