“Beynəlxalq öhdəliklərini yerinə yetirmək əvəzinə, BTQ-nin simasında süni düşmən obrazı formalaşdırılır”
Bakı Təşəbbüs Qrupu Fransa XİN başçısına cavab verib.
APA xəbər verir ki, fransalı nazirin növbəti ittihamlarına Bakı Təşəbbüs Qrupunun icraçı direktoru Abbas Abbasov cavab verib.
O, səslənən fikirləri əsassız adlandırıb: “Jan Noel Barot növbəti dəfə Fransa Milli Assambleyasındakı çıxışını Bakı Təşəbbüs Qrupuna həsr edib. İlk növbədə, bəyan edirik ki, nazirin səsləndirdiyi ittihamlar əsassız, qeyri-obyektiv və qərəzlidir. Təşkilatımızın beynəlxalq hüquq çərçivəsində fəaliyyətini hədəfə alan bu cür iddiaları qətiyyətlə rədd edirik”.
O qeyd edib ki, xoş niyyətlə Fransa hökuməti ilə koloniyalar arasında danışıqlarda vasitəçilik təklif edən Bakı Təşəbbüs Qrupunu sabitliyi pozmaqda, gərginliyi artırmaqda və digər qeyri-qanuni fəaliyyətdə təqsirləndirmək Fransanın əsarət altında saxladığı xalqların tələblərini icra etməkdən boyun qaçırmaq cəhdidir: “Fransa hökuməti beynəlxalq öhdəliklərini yerinə yetirmək əvəzinə, BTQ-nin simasında süni düşmən obrazı formalaşdırır və Fransa ictimaiyyətini aldatmaqda davam edir.
BTQ dekolonizasiya, habelə əsarət altında saxlanılan xalqların öz müqəddəratını təyin etmək hüququnun təmin edilməsi uğrunda mübarizə aparır, adaların sahibi olan yerli xalqların tarixi, mədəni kimliyinə hörmət edilməsini tələb edir. BTQ bu tələbləri irəli sürərkən Fransanın da səs verdiyi Ümumdünya İnsan Hüquqları Bəyannaməsinə (1948), BMT Baş Assambleyasının 1514 saylı Qətnaməsinə (Dekolonizasiya haqqında Bəyannamə, 1960) və digər universal sənədlərə istinad edir”.
Abbas Abbasov rəhbərlik etdiyi təşkilatın Fransa hökumətini kolonial təfəkkürdən əl çəkməyə, xalqların azad olmaq hüququna hörmət etməyə, törətdiyi çoxsaylı insanlıq əleyhinə və müharibə cinayətlərini etiraf edərək üzr istəməyə və bundan əziyyət çəkən xalqlara layiqli kompensasiya ödəməyə çağırıb.
Qeyd edək ki, Fransanın xarici işlər naziri Jan Noel Baro parlamentdə çıxışı zamanı iddia edib ki, fransız Polineziyasında hakimiyyətdə olan və ən çox deputatla təmsil olunan Tavini Partiyası Azərbaycan tərəfindən yönləndirilir. Bundan başqa nazir deyib ki, 2023-cü ildən etibarən, Bakı Təşəbbüs Qrupu vasitəsilə bu ərazilərdəki gərginlikləri alovlandıran, böhranları dərinləşdirən fəaliyyət müşahidə olunur. Baro “misal” kimi Yeni Kaledoniyada zorakılıqları, Qvadelup və Martinikdə qarşıdurmaları, Mayotda Çido qasırğasından doğan narazılıqları xatırladıb. Fransa XİN-in başçısı iddia edib ki, guya Azərbaycan “rəqəmsal təsir”, “kibertəhlükə”, “informasiya manipulyasiyası”, “Frsansanın müstəmləkəçi kimi təqdim olunması” kimi müxtəlif üsullarla bu ərazilərdəki proseslərə müdaxilə edir və bütün bunlardan “müstəqillik tələblərini qızışdırmaq üçün” istifadə olunur.
