36 nəfər yararsız olduğu halda hərbi xidmətə çağırılıb, 26 nəfərin isə sağlam olsa da…
Səfərbərlik və Hərbi Xidmətə Çağırış üzrə Dövlət Xidməti (SHXÇDX) tərəfindən 2023-cü ilin may ayından etibarən korrupsiya hüquqpozmaları və digər neqativ hallarla bağlı araşdırma aparılması üçün Baş Prokurorluğa təqdim olunmuş məlumatlar açıqlanıb.
Baş Prokurorluqdan verilən xəbərə görə, qeyd olunan dövrdə mütəmadi olaraq sistemli şəkildə həm SHXÇDX, həm də digər dövlət qurumları ilə birgə hərbi xidmətə çağırış zamanı yol verilən qanun pozuntularının qarşısının alınması, şəffaflığın təmin edilməsi və korrupsiya hallarının aradan qaldırılması məqsədilə kompleks tədbirlər görülüb. Belə ki, 2025-ci ilin birinci rübündə Baş prokuror yanında Korrupsiyaya qarşı Mübarizə Baş İdarəsi tərəfindən qeyd olunan sahədə aparılmış araşdırmalar zamanı ümumilikdə 36 nəfərin hərbi xidmətə yararsız olduğu halda çağırıldığı, 26 nəfərin isə sağlam olmasına baxmayaraq, tibbi müayinədən sonra xidmətə yararsız kimi qeyd olunduğu müəyyən edilib. Həmçinin 12 şəxsin müxtəlif saxta sənədlər vasitəsilə hərbi xidmətdən yayınması faktları aşkarlanıb. Bir çağırışçının xəstə olmasını təsdiqləyən yalnız bir həkim ekspert olmur.
Aydın Mirzəzadə
Milli Məclisin deputatı Aydın Mirzəzadə “Yeni Müsavat”a mövzu ilə bağlı fikirlərini belə izah edib: “Hər çağırışda on minlərlə Azərbaycan gənci həkim komissiyasında keçir, sağlam sağlam kimi, xəstə də xəstə kimi aydınlaşdırılır və sonrakı addımlar atılır. Bu gün Azərbaycanda hərbi xidmətə yararsız olan şəxslərlə bağlı həkim komissiyası tərəfindən müvafiq qərarlar verilir. Bununla belə, Baş prokuror yanında Korrupsiyaya qarşı Mübarizə Baş İdarəsinin ortaya çıxardığı faktlar onu göstərir ki, görülən böyük bir işin qarşısında belə qanunazidd addımlar da atılır. Hər iki hal qəbuledilməzdir. Xidmətə yararsızın xidmətə çağırılması yolverilməzdir, çünki o, təkcə hərbi xidmətə zərər vermir, eyni zamanda ailəsi gərginlik keçirir. Çox təəssüf ki, xidmətə yararsız olduğu halda xidmətə cəlb olunmaq gəncin ya xidmət etdiyi dövrdə, yaxud da xidmətdən sonra yaşadığı gərginlik sağlamlığa zərər vura, hətta həyatını dəyişə bilər. Eyni zamanda sağlamlığı imkan verdiyi halda kiminsə yararsız kimi qeyd edilməsi birbaşa cinayətdir. Bununla bağlı qanunvericilikdə nəzərdə tutulmuş qaydada müvafiq tədbirlər görülməlidir. Görünən odur ki, dövlət bu məsələyə ciddi diqqət edir. Bir tərəfdən təhlükəsizliyimizin qorunması üçün hərbi çağırış qaydalara uyğun həyata keçirilir və silahlı qüvvələrimiz on minlərlə Vətəni qorumağa hazır olan sağlam gənc əsgər əldə edir, digər tərəfdən isə sağlamlığında həqiqətən problem olanları ya müalicəyə göndərirlər, ya da xidmətdən kənarda saxlayırlar. Qanunazidd addımlar isə ortaya çıxdıqdan sonra hüquqi qiymət verilir. Azərbaycan dövləti heç bir məlumatı cəmiyyətdən gizlətmir. Baş prokuror yanında Korrupsiyaya qarşı Mübarizə Baş İdarəsi tərəfindən aparılmış araşdırmaların nəticələrinin açıqlanması onu göstərir ki, bu məsələdə dövlətin mövqeyi qətidir və hər zaman da belə olacaq”.
Emin Həsənli
Hərbi ekspert Emin Həsənli isə qeyd edib ki, bu istiqamətdə məqsədyönlü addımlar atılır. “Yeni Müsavat” a şərhində ekspert qeyd edib ki, xüsusilə Əmək və Əhalinin Sosial Müdafiə Nazirliyinin tərkibində həkim komissiyasından keçməklə bağlı Cənab Prezidentin imzaladığı fərman çox önəmlidir: “Şəffaflığın artırılması baxımından bu çox önəmli idi, çünki uşaq yaşlarından əlilliyi olanların bazası nazirlikdə mövcuddur. Əlilliyin müəyyən edilməsi ilə bağlı bütün proseslər nazirliyin tabeliyindəki qurumların səlahiyyətindədir və son illər bu istiqamətdə xeyli islahat aparılıb. Həqiqi hərbi xidmətə çağırılanların tibbi şəhadətləndirilməsi zamanı bir sıra qərarların qəbulu üçün yekun tibbi müayinənin ƏƏSMN tərəfindən aparılmasını Səfərbərlik və Hərbi Xidmətə Çağırış üzrə Dövlət Xidmətinin rəhbərliyi Baş Prokurorluqla birgə təklif etmişdi. Təəssüf ki, dünyanın hər yerində nöqsanlar var. Rəqəmlərə gəlincə, nöqsanlar kütləvi hal almır. Onların aradan qaldırılması üçün isə davamlı mübarizə aparılır, maarifləndirmə işləri də davam etdirilir, o cümlədən Baş Prokurorluq qanunvericiliyin tələblərinə uyğun olaraq, tədbirlər həyata keçirir. Bəzən xəstəliyi olan çağırışçılar hərbi xidmət keçmək istəyirlər. Bunun ilk səbəbi vətənpərvərliklə bağlıdır, bir qisim isə gələcəkdə hüquq-mühafizə orqanlarında xidmət etmək istədiyi üçün hərbi xidməti keçmək istəyir. Hesab edirəm ki, müəyyən vəziyyətlərlə barışmaq lazımdır. Mətbuat da, QHT də ictimai nəzarəti gücləndirməli, hüquq-mühafizə orqanları isə ardıcıl tədbirlər görməlidir”.
