Hərbi canilərin məhkəməsi bu il yekunlaşa bilərmi – hüquq müdafiəçisindən proqnoz…
Aprelin 11-də hərbi cinayətlər törətməkdə təqsirləndirilən erməniəsilli şəxslərin cinayət işi üzrə məhkəmənin baxış iclası keçirilib. Proses Bakı Məhkəmə Kompleksində Bakı Hərbi Məhkəməsinin hakimi Zeynal Ağayevin sədrliyi ilə baş tutub.
Qeyd edək ki, onlar Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma Dağlıq Qarabağ respublikası və onun qanunsuz silahlı birləşmələri tərəfindən Azərbaycana və xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərdə təqsirləndirilirlər. Demək olar, hər həftə məhkəmə istintaqı davam etdirilir.
Çingiz Qənizadə
Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə “Yeni Müsavat”a şərhində bildirdi ki, məhkəmə proseslərində erməniəsilli şəxslərin törətdiyi cinayətlər nəticəsində zərərçəkmiş şəxs kimi tanınan Azərbaycan vətəndaşları da iştirak edirlər. Hüquqşünas prosesin hazırda daha çox təqsirləndirilən şəxslərin dindirilməsi mərhələsində olduğuna diqqət çəkdi: “Onlar sərbəst ifadələr verirlər, eyni zamanda törətdikləri cinayətləri etiraf edirlər. Ən əsası da budur ki, təqsirləndirilənlərin hər biri ifadələrində dolayı yaxud da birbaşa bildirirlər ki, bütün tapşırıqlar Ermənistandan gəlib, silahları Ermənistan tədarük edib, onlar qanunsuz fəaliyyətlə məşğul olublar. Azərbaycanın bir hissəsini işğal etməklə müstəqil respublika yaradıb, Ermənistana birləşdirmək niyyətləri olub. Bu proses hələ davam edir və nə qədər davam edəcəyini dəqiq demək mümkün deyil. Hər yeni hala görə yeni ifadələr alınır, ittiham tərəfinin, zərərçəkənlərin, hakimlərin, şahidləri sualları çox olduğu üçün prosesin nə qədər davam edəcəyini proqnozlaşdırmaq çətindir. O cümlədən prosesin bu il bitib-bitməyəcəyini demək də qeyri-mümkündür. Adi məhkəmə prosesi aylarla davam edə bilər. Nəzərə almaq lazımdır ki, bu prosesdə təqsirləndirilən və zərərçəkənlərin sayı çoxdur. Təxmin edirəm ki, prosesin təxminən ortasındayıq, bəlkə də heç ortasında deyilik çünki sonda ittiham tərəfinin, zərərçəkənlərin çıxışları olacaq, onlara hazırlıq üçün zaman veriləcək. Hesab edirəm ki, məhkəmə prosesi ilin sonuna qədər bitə də bilər, bitməyə də. Bizim üçün zaman önəmli deyil. Əsas məsələ cinayətləri törədənlərin layiqli cəzalarını almasıdır. Azərbaycan dövləti və xalqı uzun illərdir ədalətin bərpa olunmasını gözləyir. Bu inam bizim hər birimizdə var”.
Xatırladaq ki, Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələri tərəfindən törədilən cinayətlərdə ittiham olunan 15 nəfər – Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan Davit Klimi, Mnatsakanyan Levon Henrikoviç, Beglaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiriyə qarşı Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.
