Elməddin Muradlı: “Bir çox sürücülər yola çıxmadığı halda taksi sürücüləri yağışlı, dumanlı, qarlı havada riskli olsa da, işləyirlər”
Paytaxtda son iki gündə müşahidə olunan yağışlı və küləkli hava şəraiti nəqliyyat sisteminə də öz təsirini göstərdi. Xüsusilə taksi xidmətlərində qiymətlərin yenə də kəskin şəkildə artdığı müşahidə olunub. Vətəndaşlar sosial şəbəkələrdə müxtəlif taksi tətbiqlərində qiymət artımına dair narahatlıqlarını ifadə edirlər. Müşahidələrə əsasən, adi günlərdə 5-7 manat civarında olan qısa məsafəli taksi səfərləri əlverişsiz hava şəraitində 20-25 manatdan başlayaraq daha yüksək qiymətlərlə təklif olunur. Sosial şəbəkə istifadəçiləri bəzi hallarda 3-5 manatlıq məsafə üçün 30 manatadək ödəniş tələb olunduğunu bildirirlər. Hətta komfort kateqoriyalı taksilərdə qiymətlər 60 manata qədər yüksəlib.
Vətəndaşlar həmçinin tələbat artdığından və əksər taksi sürücüləri riskli hava şəraitinə görə yola çıxmadıqlarından taksi tapmaqda çətinlik yaşadıqlarını bildirirlər. Onlar qeyd edirlər ki, bir çox taksi sürücüsü 7-8 manatlıq sifarişləri qəbul etmədiyindən uzun müddət yolda qalmalı olurlar. Nəticədə taksi şirkətləri Bakıdan Bakıya Bakıdan Şəkiyə qiymətinə getməli olurlar.
Nəqliyyat sahəsi üzrə ekspert Elməddin Muradlı “Yeni Müsavat”a bildirdi ki, taksi fəaliyyətində qiymətlərin tənzimlənməsi məsələsi hələ də açıq qalır: “Hazırda taksi fəaliyyəti ilə bağlı konkret qiymət müəyyənləşməyib. Sadəcə, aidiyyəti qurum tərəfindən sadəcə tövsiyə edilib ki, aşağı hədd olaraq, 2,50 AZN-dən ucuz sifariş ola bilməz. Yuxarı hədd məsələsi isə açıq qalıb. Bununla bağlı tədbir görülmədiyi üçün sürücülər bundan istifadə edir. Bununla yanaşı, sürücüləri də qınamaq olmur. Bir çox sürücü yola çıxmadığı halda taksi sürücüləri yağışlı, dumanlı, qarlı havada riskli olsa da, işləyirlər. Beynəlxalq təcrübədə də gecə-gündüz tarifi anlayışı var. O cümlədən əlverişsiz hava şəraitində qiymətlər fərqli ola bilər. Odur ki, bu yanaşma normaldır. Sadəcə, bunu hər hansı formada tənzimləsələr, daha yaxşı olar. Bunun qarşısını almağın yeganə yolu qiymətlərin kilometrə görə tənzimlənməsidir. Digər tərəfdən, əlverişsiz hava şəraitində taksilər üçün tarif tənzimlənməsi həyata keçirilməlidir”.
Eldəniz Cəfərov
Nəqliyyat sahəsi üzrə ekspert Eldəniz Cəfərov “Yeni Müsavat”a şərhində qeyd etdi ki, dünyanın bir çox ölkəsində taksi qiymətləri sutkanın müxtəlif zamanlarına, iqlim şəraitinə görə dəyişir: “Taksilərin rahat fəaliyyət göstərməsi üçün yol olmalıdır. Uyğun şərait yaradılmalıdır ki, taksi tıxacda qalmasın, yağış yağanda tunelləri su basmamalıdır ki, taksilər rahat işləyə bilsinlər. Fikrimcə, hazırkı qiymətlər qənaətbəxşdir, vətəndaş üçün əlçatandır, sadəcə, bəzi taksi şirkətləri müəyyən vəziyyətlərdən sui-istifadə edərək qiymətləri faizlə deyil, 3-4 dəfə qaldırırlar. Müvafiq qurumlar taksi şirkətləri qarşısında məsələ qaldırmalıdırlar”.
Yasin Mustafayev
Nəqliyyat eksperti Yasin Mustafayev isə Qaynarinfo-ya açıqlamasında deyib ki, çətin hava şəraitində taksi qiymətlərini bu qədər qaldırmaq olmaz. Onun sözlərinə görə, artım qanunsuz deyil, amma insafsızlıqdır: “Sıxlıq, çətinlik, tələbat artan kimi taksilərdə qiymətlər artır. İstər təyyarədə olsun, istər sürət qatarında, dünya təcrübəsində bu var. Tələbat artan kimi qiymət artır, adi vaxtlarda isə azalır. Bu düzgün deyil, amma şirkətlər də belə siyasət qurublar. Yəni dünyada qəbul edilmiş bir sistemdir. Taksi fəaliyyətində qiymət artımı hava şəraitinə görə dəyişir. Qiymət artımı sərnişinlərə çox ciddi təsir göstərir. Bir də görürsən iki, hətta 3 dəfəyə kimi qiymət qalxa bilir. Buna görə də insanlar əziyyət çəkir. Belə olan halda biz onlara qiyməti niyə qaldırırsınız deyə bilmərik. Bu gün taksi fəaliyyətində sabit qiymət yoxdur. Qiyməti bazar və rəqabət tənzimləyir. Rəqabətdə də bir çox seçimimiz var”.
Yasin Mustafayev əlavə edib ki, bu günlərdə hansı şirkət ucuz xidmət göstərirsə, onlara müraciət etmək daha məqsədəuyğun olar.
