Ermənistanda həbs yerlərində ölənlərin sayı artmaqda davam edir.
“Report” xəbər verir ki, bu barədə ölkənin Kriminal İcra Xidməti məlumat yayıb.
Aprelin 20-də İrəvanın “Nubaraşen” həbsxanasında 54 yaşlı məhbus Z.Q. intihar edib. Bu, 2025-ci ilin əvvəlindən Ermənistan həbsxanalarında ölümlə nəticələnən 10-cu hadisə və beşinci intihardır.
Hüquq müdafiəçisi Janna Aleksanyanın sözlərinə görə, ölkənin penitensiar sistemində vəziyyət xeyli pisləşib.
2024-cü ildə Ermənistan həbsxanalarında 12 ölüm halı qeydə alınıb. Bundan əlavə, 298 məhbus aclıq aksiyası keçirib, 200 məhbus isə özlərini şikəst edib. Hüquq müdafiəçilərinin fikrincə, bu məlumatlar dövlətin belə hadisələrin qarşısını almaq üçün təsirli tədbirlər görmək iqtidarında olmadığını göstərir.
Aleksanyan onu da bidirib ki, hüquq-mühafizə orqanları sistem problemlərini həll etmədən baş verənləri daha əlverişli prizmadan təqdim etməyə çalışırlar.
“Nübaraşen”də “təmizlik”
Aprelin əvvəlində Ermənistan mətbuatı “Nubaraşen” həbsxanasında məhbuslarla amansız rəftar barədə məlumat yayıb. Aleksanyanın sözlərinə görə, ömürlük azadlıqdan məhrum edilənlərin saxlandığı beşinci mərtəbədə “təmizləmə” aparılıb.
Kriminal İcra Xidməti xüsusi təyinatlıların fiziki güc tətbiq etdiyini təsdiqləyib. Bildirib ki, məhkumlardan biri “vəziyyəti gərginləşdirib”. Məhkum kameranın qapısındakı yeməklərin keçirildiyi lyukun açıq qalmasını tələb edib, həmçinin gəzinti vaxtının uzadılmasında israr edib.
Ədliyyə naziri Srbuhi Galyan bildirib ki, həbsxana əməkdaşları tərəfindən heç bir sui-istifadə halları olmayıb: “Məhkumlar etiraz aksiyası keçirməyə cəhd ediblər və bununla da qanunsuz hərəkətlərə, o cümlədən əmlakın yandırılmasına yol veriblər. Bu, yolverilməzdir, ona görə də qanun çərçivəsində tədbirlər görülüb”.
Ermənistan Ombudsman Aparatı məhbuslarda xəsarətlərin olduğunu təsdiqləyib: “Ofis nümayəndələri saxlanılanların bədən xəsarətlərini sənədləşdiriblər”. Eyni zamanda, ədliyyə naziri daha əvvəl bildirmişdi ki, məhkumlar arasında zərərçəkən olmayıb.
Müstəqil müşahidəçilər zorakılıq əlamətlərini qeydə alırlar
Rəsmi məlumatlara görə, “Nubaraşen” həbsxanasında 391 məhbus və 183 məhkum saxlanılır. Məhbuslara qarşı zorakılıq xəbərlərindən sonra müstəqil müşahidəçilər həbsxanaya baş çəkiblər. Onların sözlərinə görə, zorakılıq əlamətləri qeydə alınıb.
