Sosial şəbəkələrdə antikvar hesab olunan əşyaların yüksək qiymətlərlə satılması geniş müzakirələrə səbəb olub. Xüsusən, nadir və tarixi əşyaların qiymətləri bəzən ağlasığmaz dərəcədə baha olur.
Milli.Az xəbər verir ki, tikiş maşınları 15 min manatdan başlayaraq 75 min manata qədər təklif edilir. Bu əşyaların bahalaşmasının səbəbi olaraq tərkibində uran və ya “qırmızı civə” kimi qiymətli elementlərin olduğu iddia edilir.
Antik əşyalar üzrə mütəxəssis Eduard Şamaryayev Milli.Az-a açıqlamasında bildirib ki, bu cür iddialar yalnız dələduzların yaydığı saxta məlumatlardır. Şamaryayev, xüsusilə “Singer” tikiş maşınlarının tərkibində platin olduğunu deyənlərin yalan danışdığını bildirib:
“Özüm bir neçə ‘Singer’ tikiş maşınına baxmışam və deyirlər ki, bunların içində 1 kiloqram platin var. Bu cür iddiaların heç bir əsası yoxdur”, – deyə o qeyd edib.
O, həmçinin qeyd edib ki, sosial şəbəkələrdə 22 min manata satılan dekorativ balıq qablarının əslində cəmi 30-40 manat dəyərindədir. Belə qiymətlərin təyin olunmasında qeyri-peşəkar yanaşmalar və saxta məlumatlar önə çıxır. Antik əşyaların doğru qiymətləndirilməsi ciddi və ixtisaslaşmış yanaşma tələb edir. Bu iş peşəkar qiymətləndiricilər tərəfindən xüsusi metod və qaydalara əsasən aparılmalıdır.
