Azərbaycanlı bloger Hüseyn Həsənov Rusiyada çirkli pulların yuyulması ittihamı ilə axtarışa verilib. Xüsusilə külli miqdarda pul vəsaitlərinin leqallaşdırılması və yuyulmasında ittiham olunur.
Mətbuat Şurasının İdarə Heyətinin üzvü, texno-bloger Fərid Pərdəşünas sosial media hesabında yazıb ki, izləyiciləri tərəfindən yazılan bəzi informasiyalara görə, Azərbaycanda da belə blogerlər var: “Xüsusilə vasitəçi şirkətlərin dəstəyi ilə xarici brend məhsulları həddən artıq yüksək qiymətə reklam edərək, pulun leqallaşdırılmasında iştirak edirlər. Bununla bağlı məndə sübutlar olmasa da, bu formada mesajlar alıram. İddiaçıların dediyinə görə, bu səbəbdən də qəflətən blogerlərin lüks həyat tərzləri sosial mediada göz qamaşdırmağa başlayır”.
Fərid Pərdəşünas
F.Pərdəşünas təklif edib ki, aidiyyəti dövlət qurumu bu fəaliyyət növünü dəqiq kodlar altında birləşdirib, içi özü qarışıq hamını audit etsin: “Düşünürəm ki, əgər bazarda belə hallar varsa, hər qəpiyinin vergisini verən mənim kimi yaradıcı məzmun istehsalçılarına qarşı haqsızlıq yaranmış olar”.
Qeyd edək ki, mayın 14-də bloger H.Həsənov qiyabi həbs edilib və onu 7 ilə qədər həbs gözləyir. Həsənova qarşı xüsusilə külli miqdarda pul vəsaitlərinin leqallaşdırılması və yuyulması maddəsi ilə cinayət işi açılıb.
2024-cü ilin iyulunda Təhlükəsiz İnternet Liqasının rəhbəri Yekaterina Mizulina blogeri fırıldaqçı adlandırıb və əlavə edib ki, onun Daxili İşlər Nazirliyinə müraciətindən sonra blogerin bir neçə şirkəti dövlətə borclarına görə bağlanıb. Həsənov 2019-2021-ci illərdə 170 milyon rubldan çox (təxminən 3,6 milyon manat) məbləğində vergidən yayınmaqda ittiham olunur.
Hüseyn 2024-cü ildən Rusiyada yaşamır. Onun Azərbaycana köçdüyü bildirilir və son vaxtlar iş adamı Emin Ağalarovla tez-tez görüntüləri “Tik tok”da yayılır.
Vüsal Yusifli
“Yeni Müsavat”a danışan elmi bloger Vüsal Yusifli bildirib ki, kommersiya şirkətində rəsmi şəkildə çalışan blogerlər vergi ödəməlidirlər:
“Mən özüm də sırf bloger fəaliyyətimlə bağlı vergi ödəyicisiyəm. Qeyri-qanuni mərc oyunlarının, tütün məhsullarının, enerji içkilərinin reklamından söhbət gedirsə, əlbəttə, onu reklam edən blogerlər vergi verməlidirlər. Çünki bu birbaşa olaraq büdəcədən kənara gedən pullardır. Dostlarıma və ətarfıma da məsləhət görürəm ki, gəlirlərini şəffaf göstərsinlər. Artıq illərdir ki, Dövlər Vergi Xidməti buna çağırışlar edir”.
Elvin İbrahimzadə
Bloger Elvin İbrahimzadə bildirib ki, əməkdaşlıq etdiyi şirkətlərin hamısı ilə vergi faizi ilə çalışır: “İllərdir ki, mənim hesabım var. Mən reklam, film xidmətlərinin vergisini ödəyirəm. Buna görə də yoxlamalar məni qorxutmur. Tanıdığım blogerlər də vaxtında vergilərini ödəyirlər, gəlirlərini açıq göstərirlər. Heç birinin vergi problem yoxdur. Şirkətlər də onsuz vergisiz işləmirlər. Bu baxımdan bizim gəlirlərimiz şəffafdır”.
Əkrəm Həsənov
Hüquqşünas Əkrəm Həsənov qəzetə açıqlamasında bildirib ki, blogerlər fərdi sahibkardılarlar və buna görə vergi ödəməlidirlər: “Sadəcə olaraq onları izləyib nəzarət etmək çox çətindir. Rusiyada isə bu asandır. Çünki orada vətəndaşların gəlir və xərc bəyannaməsi var. Gəlirlər açıq şəkildə göstərilir. Bizdə isə gəlir bəyannaməsi yoxdur. Bizdə bu olsaydı, blogerlərin gəlirlərini yoxlamaq olardı. Ona görə də şou-biznes əhlinin, tiktokerlərin, blogerlərin gəlirlərini dəqiqləşdirmək mümkün deyil. Onlara pul bank hesabı ilə verilmir. Nəticədə onlar vergidən yayınır”, -deyə Ə. Həsənov bildirib.
