Hər il may ayının 20-də Ümumdünya Metrologiya Günü qeyd olunur. Bu əlamətdar tarixin qeyd olunmasında əsas məqsəd dəqiq və etibarlı ölçmələrin cəmiyyət üçün strateji əhəmiyyətini diqqətə çatdırmaqdır.
AZƏRTAC xəbər verir ki, 1875-ci il may ayının 20-də metrologiya sahəsində beynəlxalq əməkdaşlığın əsasını qoyan Metrik Konvensiya imzalanııb.
Konvensiyaya uyğun olaraq, Beynəlxalq Kəmiyyət Ölçüləri və Çəkiləri Bürosu (BKÖÇB) yaradılıb və ölçmələr üzrə elm sahəsində beynəlxalq əməkdaşlığın əsasları və onun sənayedə, ticarətdə cəmiyyətin mənafeyi naminə praktiki tətbiqi mexanizmləri işlənib hazırlanıb. Metrik Konvensiyası bütün ölkələrdə elmi-texniki tərəqqiyə təsir edib. Belə ki, məhz bu sənəddən sonra ölçmələrin metrik sistemi və beynəlxalq vahidlər sistemi tətbiq edilib, onun əsasında Beynəlxalq Ölçmələr Sistemi yaradılıb.
Metrik Konvensiyanın ən başlıca məqsədi olan ölçmələrin vəhdətinin bütün ölkələrdə təmin edilməsi bu gün də çox vacib məsələdir. Konvensiya elmi tədqiqatlar, innovasiyalar, sənaye, beynəlxalq ticarət, insanların həyat keyfiyyətinin yüksəldilməsi və ətraf mühitin qorunması üçün vacib olan qlobal ölçmə sistemini formalaşdırıb.
Bu il Ümumdünya Metrologiya Günü xüsusilə əlamətdar hesab edilir. Belə ki, 2025-ci ildə həm də Metrik Konvensiyanın 150 illik yubileyi qeyd olunur.
Azərbaycan Metrologiya İnstitutu (AzMİ) ölkəmizdə metrologiya sahəsinin inkişafı, müasir metodların tətbiqi, eləcə də beynəlxalq standartlara uyğunluğun təmin olunması istiqamətində fəaliyyətini uğurla davam etdirir. AzMİ beynəlxalq tutuşdurmalarda fəal iştirak edərək ölçmələrin dəqiqliyini və etibarlılığını təmin edir, həmçinin ölkənin elm və texnologiya, sənaye, ticarət və digər sahələrdə inkişafına töhfə verir.
Bu istiqamətdə ölkədə etalon bazasının müasirləşdirilməsi və təkmilləşdirilməsi, o cümlədən dövrün tələblərinə cavab verən texnologiyaların tətbiqi, peşəkar metroloqların hazırlanması və bu sahənin modernləşdirilməsi üzrə tədbirlər həyata keçirilir.
