Ombudsmanın fəaliyyəti çərçivəsində bərabərlik hüququnun təmininə dair sosial videoçarx hazırlanıb
Bərabərlik hüququ və bərabər hüquqi rəftar hüququn hamılıqla qəbul edilmiş bir prinsipidir. Ümumdünya İnsan Hüquqları Bəyannaməsinin də əsas qayəsi hər bir kəsin ayrı-seçkiliyə məruz qalmadan bərabər şəkildə hüquqlardan istifadə etməsidir. Azərbaycanda hüquq bərabərliyinin təmin olunması və ayrı-seçkiliyin aradan qaldırılması dövlət siyasətinin mühüm tərkib hissələrindən birini təşkil edir və hazırda qüvvədə olan milli qanunvericilikdə ayrı-seçkiliyin qadağan olunmasına, hüquq bərabərliyinin təmini və təşviq edilməsinə yönəlmiş müddəalar var.
Ombudsman Aparatından AZƏRTAC-a bildirilib ki, Azərbaycan Respublikası Konstitusiyasında və ölkəmizin tərəfdar çıxdığı beynəlxalq müqavilələrdə təsbit olunmuş insan hüquqları və azadlıqlarının müdafiəsi sahəsində fəaliyyət göstərən Azərbaycan Ombudsmanı bütün digər hüquqlarla yanaşı, insanların bərabərlik hüququnun müdafiəsi və təşviqi sahəsində mühüm səlahiyyətlərə malikdir. Bərabərlik hüququnun təşviqi və ayrı-seçkiliyin aradan qaldırılması sahəsində ictimai məlumatlılığın artırılması zərurətini nəzərə alaraq Ombudsman Səbinə Əliyevanın təşəbbüsü ilə sosial videoçarx hazırlanıb.
Videoda multikulturalizm və çoxmillətlilik kimi dəyərlərin daima qorunub saxlandığı ölkəmizdə əhalinin müxtəlif həssas qrupları da daxil olmaqla, bütün şəxslərin eyni hüquq və azadlıqlara malik olduğu, heç kimin qanunla müdafiə edilən və malik olduğu əlamətlərə, yəni, cinsinə, irqinə (dərsinin rənginə), məhkumluq keçmişinə, əlilliyə, yaşına, dininə və sairə xüsusiyyətlərinə görə ayrı-seçkiliyə məruz qalmasının yolverilməz olduğu qeyd edilir. Habelə, gender bərabərliyi baxımından kişi və qadınların eyni hüquq və azadlıqlara, eləcə də ailədə, xüsusilə övladlarına qarşı ümumi öhdəliklərə sahib olduğu diqqətə çatdırılır.
