Vətəndaşın mülkiyyəti tanınmayanda bir çox hüquqi proseslər qəlizləşir. Söhbət sənədsiz evlərdən gedir. Ölkə ərazisində onların sayı az deyil. Bu evlərlə bağlı sakinlərin ən çox əziyyət çəkdiyi ərazi Sulutəpə rayonudur.
Milli.Az xəbər verir ki, sakinlərin sözlərinə görə onlar xəstəxanaya getmək, övladlarını işə qoymaq və digər məsələlərdə qeydiyyat probleminə görə çətinliklə üzləşirlər.
Əmlak məsələləri üzrə ekspert Elnur Fərzəliyev bildirir ki, təkcə paytaxtda və Abşeron ərazisində 500 minə yaxın çıxarışla təmin oluna bilməyən fərdi yaşayış evləri, torpaq sahələri və müxtəlif növ əmlaklar mövcuddur:
“Hal-hazırda yeniliyə əsasən, yaxın gələcəkdə bu tip əmlaklara çıxarışla bağlı vətəndaşlar müraciət edərkən onların müraciəti daha dərindən araşdırılacaq və torpaqların təyinatında yaxud yerləşməsində hər hansı çətinlik olarsa, onlar tam müəyyən olduqdan sonra vətəndaşlara dolğun məlumat veriləcək. Vətəndaşlar aidiyyatı üzrə imtina aldıqdan sonra məcburən məhkəmə yolu ilə çıxarış almağa çalışırlar. Məhkəmə isə bəzən uzun çəkə bilər”.
Ekspert dəyişikliklərin artıq bu tip əmlaklar üzərindən böyük hissəsinin çıxarışla təmin olunmasına səbəb ola biləcəyini qeyd edir.
Millət vəkili Azər Badamovun sözlərinə görə, həmin məsələ Milli Məclisdə müzakirəyə çıxarılıb. Milli Məclisin iqtisadi, sənaye, siyasət, sahibkarlıq komitəsinin iclasında daşınmaz əmlakın dövlət reyesteri haqqında qanun lahiyəsi müzakirə olundu. Bu qanun layihəsinin 9 və 15-ci maddələrinə yeni bəndlərin əlavə edilməsi nəzərdə tutulur. Doqquzuncu bənd hüquqların dövlət qeydiyyatına alınması ilə bağlıdır. 15-ci bənd isə hüquqların dövlət qeydiyyatına alınmasından imtina edilməsi ilə bağlıdır.
Deputat onu da qeyd edir ki, uyğunluq olduğu halda dövlət kadastrında düzəliş edilərək vətəndaşın müraciətinə müsbət rəy verilir. Uyğunsuzluq aşkarlandıqda isə vətəndaşın müraciətinə qaydalara əsaslanan imtina cavabı veriləcək.
Qeyd edək ki, qanun layihəsinə edilən dəyişiklik vətəndaşların məhkəmə müraciətlərini azaldacaq.
