Hər il 26 iyun tarixində xalqımız Azərbaycan Silahlı Qüvvələr Günü münasibətilə ordumuza olan sevgisini, inamını və qürurunu ifadə edir. Bu gün təkcə bir təqvim bayramı deyil, həm də güclü dövlətin təməl dayağı olan ordunun formalaşmasının, inkişafının və zəfərlə taclanmasının simvoludur.
Müstəqil Azərbaycanın ordu quruculuğu ideyasının banisi məhz Ulu Öndər Heydər Əliyev olmuşdur. Hələ 1971-ci ildə onun təşəbbüsü ilə yaradılan Cəmşid Naxçıvanski adına hərbi məktəb on minlərlə gəncin peşəkar zabit kimi formalaşmasına zəmin yaratmışdır. 1993-cü ildə xalqın tələbi ilə yenidən hakimiyyətə qayıdan Ulu Öndər, dövlətçiliyin qorunmasının əsas dayağının məhz güclü ordu olduğunu bəyan etmiş və bu istiqamətdə mühüm islahatlara imza atmışdır.
Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi altında Azərbaycan Ordusu öz gücünü 2020-ci ildə 44 günlük Vətən müharibəsində bir daha sübut etdi. Tarixi zəfər nəticəsində torpaqlarımız işğaldan azad olundu və Azərbaycanın ərazi bütövlüyü bərpa edildi. Bu Qələbə yalnız cəsur əsgər və zabitlərimizin deyil, eyni zamanda illərlə aparılan sistemli və məqsədyönlü ordu quruculuğu siyasətinin nəticəsidir.
Azərbaycan Respublikası Silahlı Qüvvələrinin maddi-texniki bazasının yaradılması zamanı xarici ölkələrdən hərbi-texniki asılılığı azaltmaq məqsəd ilə Vətənin müdafiəsini təmin edən ordumuzun hərbi–texniki bazasını gücləndirmək məqsədilə 2005-ci ildə Müzəffər Ali Baş Komandan cənab Prezident İlham Əliyevin sərəncamına əsasən Müdafiə Sənayesi Nazirliyi yaradılmışdır. Yeri gəlmişkən bu il 2025-ci il Müdafiə Sənayesi Nazirliyinin yaranmasından 20 il ötür.
Azərbaycan Respublikasının Prezidenti cənab İlham Əliyev tərəfindən davam etdirilən iqtisadi inkişaf siyasəti islahatlarının aparılması mövcud hərbi sənaye potensialının gücləndirilməsi və ondan istifadənin səmərəliliyinin yüksəldilməsi sahəsində görülən işlər çox böyük uğurlarla müşayiət olunur. Son illərdə Azərbaycan müdafiə sənayesində də əhəmiyyətli irəliləyişlərə imza atmışdır. Müdafiə Sənayesi Nazirliyinin rəhbərliyi ilə ölkədə müxtəlif təyinatlı silahlar, sursatlar, pilotsuz uçuş aparatları, zirehli texnikalar, snayper tüfəngləri və yüksək texnologiyalı sistemlər istehsal olunur. “İti Qovan” və digər zərbə dronları, yerli istehsal olunan rabitə və müşahidə sistemləri Azərbaycan Ordusunun taktiki üstünlüyünü artıran əsas vasitələrdəndir. Bu inkişaf təkcə ordunun arsenalını gücləndirməklə kifayətlənmir, həm də ölkəmizi bu sahədə texnoloji cəhətdən müstəqil edən mühüm strateji uğurdur. Artıq Azərbaycan bir sıra məhsulları ixrac etməklə yanaşı, beynəlxalq sərgilərdə də öz müdafiə sənayesi imkanlarını nümayiş etdirir.
Qürur hissi ilə qeyd etmək istəyirəm ki, Vətən müharibəsi dövründə və ondan sonrakı mərhələlərdə müdafiə sənayesində göstərdiyim məhsuldar və səmərəli iş fəaliyyətimə görə mən də Müdafiə Sənayesi naziri tərəfindən fəxri fərmanla təltif edilmişəm. Bu təltif mənim üçün sadəcə bir sənəd deyil.
Mən fəxr edirəm ki, orduya dəstək verən, onu gücləndirən milli layihələrin bir parçası olmuşam. Vətənə, əsgərə, xalqa xidmət etmək mənim üçün hər zaman ən ali şərəfdir.
26 iyun Silahlı Qüvvələr Günü, Azərbaycanın hərbi sahəsindəki nailiyyətlərini, torpaq uğrunda canından keçən şəhidlərimizi və qalib ordumuzu xatırladan müqəddəs bir gündür. Bu gün hər bir vətəndaş üçün məsuliyyətli bir gündür. Əziz oxuyucular, gəlin bu gün Azərbyacan əsgərinə, zabitinə və şəhidlərimizin ailələrinə minnətdarlıqmızı bildirək.
Yaşasın Azərbaycan ordusu. Qarabağ Azərbaycandır !
Həsən Ağayev,
YAP Xətai rayon təşkilatının fəalı,
Müdafiə Sənayesi Nazirliyinin əməkdaşı
