“Yay aylarında havaların dəyişkən keçməsi insanların sağlamlığına həm müsbət, həm də mənfi təsir göstərir. Havaların isinməsi, xüsusilə dəniz mövsümünün açılması insanların əhval-ruhiyyəsinə müsbət təsir etsə də, qeyri-sabit hava şəraiti bir sıra sağlamlıq problemlərinə yol aça bilər”.
Bu sözləri həkim-terapevt Günay Lətifova KONKRET.az-a açıqlamasında səsləndirib.
Hər gecə yandırdığınız ağcaqanad dərmanlarının ŞOK FƏSADLARI – Nələrə səbəb olur? | KONKRET
Həkimin sözlərinə görə, son günlərdə qrip viruslarına yoluxma hallarında artım müşahidə olunur. Eyni zamanda, halsızlıq və yuxululuq kimi şikayətlərlə tibbi müraciətlərin sayı da çoxalıb.
Mütəxəssis bu hallarının səbəblərindən birinin məhz havanın kəskin dəyişməsi olduğunu vurğulayıb.
“Qan təzyiqində oynama halları artır. Günəş altında uzun müddət qalmaq belə təzyiqin dəyişməsinə səbəb ola bilər. Halsızlıq və yuxululuq kimi şikayətlərlə müraciət edən şəxslər əvvəlcə terapevt, daha sonra isə endokrinoloq müayinəsindən keçməlidirlər,” – deyə həkim bildirib.
Uzunmüddətli halsızlıq hormonal problemlərin göstəricisi ola bilər. Bu zaman hormonal analizlərin verilməsi tövsiyə olunur. Mütəxəssis bildirir ki, günəşli havaya baxmayaraq, D vitamini çatışmazlığı geniş yayılıb. Bu isə xüsusilə, insulin dirənci olan, qalxanabənzər vəzisində problem yaşayan şəxslərdə daha çox halsızlıq ilə nəticələnir.
“Halsızlıq və yorğunluq simptomlarını yüngül qəbul etməyin. Bu, bəzən daha ciddi xəstəliklərin xəbərçisi ola bilər.”
Profilaktik tədbir olaraq isə G. Lətifova bunları tövsiyə edir:
•Bol su içmək
•Gündəlik fiziki aktivlik, yürüyüş
•Açıq havada, xüsusilə yaşıllıq olan ərazilərdə vaxt keçirmək
•Yuxu rejimini normallaşdırmaq
Həkim-terapevt vətəndaşlara sağlamlıqlarına qarşı diqqətli olmağı və havaların dəyişkənliyinə uyğun həyat tərzi seçməyi tövsiyə edir.
