İsti yay günlərində düzgün qidalanma bədənin temperatur tənzimlənməsi, susuzluğun qarşısının alınması və ümumi sağlamlığın qorunması baxımından xüsusi əhəmiyyət daşıyır.
Bu barədə Modern.az-a açıqlama verən qida sahələri üzrə ekspert Fərid Səfərov bildirib ki, iqlimə uyğun qidalanmaq həm istilərin fəsadlarından qorunmağa, həm də enerjini yüksək saxlamağa kömək edir.
Ekspertin sözlərinə görə, yay mövsümündə menyuda əsas yer tutmalı olan məhsullar su və su tərkibli qidalardır:
“Bu dövrdə su, ayran, mineral sular, eyni zamanda qarpız, yemiş, xiyar, pomidor kimi tərkibində 90 faizdən çox su olan məhsullar mütləq istifadə edilməlidir. Bədəni toksinlərdən təmizləmək üçün doğranmış meyvə ilə hazırlanmış detoks suları da faydalıdır”.
Fərid Səfərov yüngül zülallı yeməkləri də yayda üstünlük verilməsi vacib olan məhsullar sırasında qeyd edib:
“Toyuq, balıq, qaynadılmış yumurta, az yağda bişmiş paxlalılar, məsələn, mərcimək salatı, həm orqanizmə yüngüldür, həm də zəruri zülalları təmin edir”.
Ekspert təzə meyvə və tərəvəzlərin də yay süfrəsinin ayrılmaz hissəsi olduğunu vurğulayıb:
“Şaftalı, ərik, gilas, albalı, moruq və tərəvəz salatları – bol limon, az duz və zeytun yağı ilə ideal seçimdir. Həmçinin dovğa, badımcan və lobya salatları, bulqur və qarabaşaqla hazırlanan yüngül salatlar yay üçün çox uyğundur. Ayran, kefir və qatıq da bağırsaq florası üçün faydalıdır”.
Fərid Səfərov yayda uzaq durulmalı qidalar barədə də xəbərdarlıq edib:
“Ağır, yağlı yeməklər, qovurma, kabab, xəngəl, dolma kimi yeməklərdən yayda mümkün qədər az istifadə olunmalıdır. Eyni zamanda şirin qazlı içkilər, hazır meyvə şirələri, ağır şirniyyatlar, konservləşdirilmiş məhsullar və kolbasa növləri orqanizmin su itirməsinə səbəb olur və zəhərlənmə riskini artırır”.
Azərbaycan mətbəxinin yay ayları üçün sağlam qidalanma baxımından geniş imkanlar yaratdığını deyən ekspert əlavə edib ki, dovğa, ayran, qatıq, badımcan salatı, kükü, lobya salatı, təzə meyvə-tərəvəz bolluğu Azərbaycan yay süfrəsinin əsasını təşkil edir.
“Nanə, sumax, keşniş kimi ədviyyatlar isə həm susuzluğun qarşısını alır, həm də tərləməni tənzimləyir. Əsas odur ki, ağır yeməkləri və şəkərli içkiləri müvəqqəti olaraq ‘tətilə göndərək’ və rasionumuzu təbii, yüngül qidalarla zənginləşdirək”.
Fərid Səfərov bildirib ki, yay mövsümündə məqsəd bədəni susuzluqdan, istilik stresindən və mədə-bağırsaq problemlərindən qorumaqdır. Bu baxımdan Azərbaycan mətbəxi ənənəvi olaraq sağlam və əlverişli seçimlər təqdim edir.
