Prezidentin köməkçisi: Nüfuzlu media qurumları Azərbaycana qarşı dezinformasiya kampaniyasının aparılmasında ön sıradadırlar
Kifayət qədər nüfuzlu media qurumları Azərbaycana qarşı sistematik şəkildə dezinformasiya kampaniyasının aparılmasına ön sıradadırlar.
“Report” xəbər verir ki, bunu Azərbaycan Prezidentinin köməkçisi − Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev III Şuşa Qlobal Media Forumu çərçivəsində jurnalistlərə açıqlamasında deyib.
O qeyd edib ki, Azərbaycan müstəqilliyin ilk illərindən həmişə sistematik şəkildə hətta psixoloji müharibə həddinə çata biləcək dezinformasiya hücumlarına məruz qalıb:
“Dünən dövlət başçısı da bu məsələ barədə ətraflı danışdı. Biz burada bir neçə kateqoriyada və bir neçə təsnifatda ölkəmizə qarşı hücumları fərqləndirməliyik. Burada ilk növbədə Qərb media dairələrindən ölkəmizə qarşı hücumlar dayanır. Ancaq bu gün nədənsə dezinformasiyadan danışarkən ilk olaraq sosial media və ya süni intellekt platformaları ön plana çəkilir. Halbuki Azərbaycanın təcrübəsində görə bilərik ki, kifayət qədər nüfuzlu media qurumları Azərbaycana qarşı sistematik şəkildə dezinformasiya kampaniyasının aparılmasına ön sıradadırlar”.
O qeyd edib ki, buradan “Le Figaro”dan başlamış digər media strukturların adını çəkmək olar.
“Həmçinin sosial media platformalarında süni intellektdən istifadə etməklə Azərbaycanın rəsmi şəxslərinin səslərini belə təhrif edəcək formada “deep fake” texnologiyası əsasında geniş dezinformasiya kampaniyası aparılır”.
Prezidentin köməkçisi vurğulayıb ki, erməni diaspor dairələri Azərbaycana qarşı müxtəlif narrativlərlə – Qarabağın tarixini təhrif edərək, dini mövzuları gündəmə daşıyaraq kampaniyalar aparırlar.
