Hipertoniya ilə mübarizədə natriumun, yəni duzun gündəlik istehlak miqdarına nəzarət xüsusi əhəmiyyət daşıyır.
Azərbaycan Qida Təhlükəsizliyi Agentliyinin (AQTA) İnformasiya təminatı və innovativ həllər şöbəsindən AZƏRTAC-a bildiriblər ki, hipertoniya xəstələri gündəlik həyatda bir neçə qaydaya əməl etməklə duz istehlakını azalda bilələr:
– Yeməkləri dadlandırmaq üçün duz əvəzinə sumax, kəklikotu, sarımsaq tozu, sarıkök, reyhan qurusu kimi ədviyyatlardan istifadə etmək olar;
– Konservləşdirilmiş, hisə verilmiş, duzlanmış, sosiska, kolbasa kimi emal olunmuş qidalardan imtina etmək tövsiyə olunur;
– Məhsul alarkən etiket məlumatlarına diqqət edin, daha az duzlu olanlara üstünlük vermək məsləhət görülür;
– Yeməklərin dadına baxmadan duz əlavə etmək gündəlik natrium istehlakını artıra bilər.
Unutmayın: Hipertoniya xəstələri üçün gündəlik natrium qəbulu 1500 mq-dan az olmalıdır. 1 çay qaşığı adi duz 2000 mq natriuma bərabərdir.
AQTA mövzu ilə bağlı hazırlanan videoçarxı təqdim edir.
