Endokrinoloq Evgeniya Bayturova xəbərdarlıq edib ki, günəbaxan tumları hər nə qədər vitamin və mikroelementlərlə zəngin olsa da, onların çox miqdarda istehlakı sağlamlığa mənfi təsir göstərə bilər.
Mütəxəssis tumları yalnız ara-sıra və bir ovucdan artıq olmamaqla qəbul etməyi tövsiyə edir.
Bayturova bildirib ki, xüsusilə qovrulmuş tumlar tərkibində artıq bitki yağı və duz saxlayır, bu isə həm kalori yükünü artırır, həm də faydalı maddələrin istilik müalicəsi nəticəsində itirilməsinə səbəb olur. Onun sözlərinə görə, 100 qram tum təxminən 600 kalori ehtiva edir ki, bu da çəki artımına yol aça bilər. Üstəlik, bir çox insan qəbul etdiyi miqdarın fərqində olmur.
Həkim əlavə edib ki, bazarda məşhur istehsalçıların məhsullarında tez-tez təhlükəli ağır metal – kadmium aşkar edilir. Bu maddə bədəndə yığılıb böyrəklərin fəaliyyətinə zərər vura, sümüklərdəki kalsiumu azaldaraq osteoporoz riskini artıra və reproduktiv sağlamlığa mənfi təsir göstərə bilər.
Bundan başqa, dəfələrlə dəyişdirilməyən yağda qızardılan tumlar kanserogen maddələrlə zəngin olur. Bu da uzun müddətdə müxtəlif sağlamlıq problemlərinə, o cümlədən onkoloji xəstəliklərə səbəb ola bilər.
Bayturova vurğulayıb ki, əgər tum dişləmək vərdişindən imtina etmək çətindirsə, heç olmasa istehlak miqdarı ciddi şəkildə azaldılmalıdır.//Milli.Az
