İnternet xidmətlərindən istifadə edən vətəndaşların tez-tez üzləşdiyi anlaşılmaz vəziyyətlərdən biri də aylıq ödənişlərlə bağlıdır.
Bəziləri düşünürlər ki, bir ayın ödənişi gecikəndə, yaxud hansisa müddət internetdən ümumilikdə siitfadə edimədikdə, sonrakı ayı ödəmək kifayətdir, bu zaman internet bərpa edilir. Digərləri isə bütün gecikmiş və ya isitfadə edilməmiş müddətin haqqını, üstəlik cərimələrin də ödənilməsinin tələb olunduğunu düşünürlər. Bu məsələdə fikir ayrılığı istifadəçilərdə çaşqınlıq yaradır.
İnternet üçün ödənişi gecikəndə, yaxud müəyyən müddət internetdən istifadə edilməzsə, bərpa üçün yalnız sonrakı dövrü ödəmək kifayətdirmi?
Mövzu ilə bağlı “Cebheinfo.az”a açıqlama verən informasiya təhlükəsizliyi üzrə mütəxəssis Fərhad Mirəliyev bildirib ki, belə problemlərin həlli müqavilə qeyd olunan şərtlərə əsasən həyata keçirilir:
“İnternet xidmətlərində ödəniş qaydaları abonentlə provayder arasında imzalanmış müqavilədə öz əksini tapır və bütün proses həmin şərtlərə uyğun həyata keçirilir. Bu xidmətlərdə əsasən iki ödəniş sistemi mövcuddur:
öncədən ödəniş (prepaid) və sonradan ödəniş (postpaid). Əgər müqavilədə əvvəlcədən ödəniş şərti nəzərdə tutulubsa və abonent vaxtında ödəniş etməyibsə, xidmət dayandırılır”. Mütəxəssis qeyd edib ki, məntiqlə abunəçiyə ödəniş etdiyi gündən yeni faktura dövrü başladılmalıdır:
“Xidmətin bərpası ilə bağlı isə müqavilədə konkret qaydalar göstərilir. Məsələn, müəyyən müddət ərzində ödəniş olunmadıqda provayder xidməti dayandıra və ödəniş edildiyi gündən yeni faktura dövrü aça bilər.
Əgər abonent müəyyən həftə və ya ay üçün ödəniş etməyib və xidmət almayıbsa, məntiqlə ödəniş etdiyi gündən yeni faktura dövrü başlamalıdır. Amma bu məsələ hər provayderin müqaviləsində fərqli şəkildə nəzərdə tutula bilər”.
