Ermənistan hərbi büdcəsini azalda bilər, Azərbaycan isə…
Ermənistanın müdafiə nazirinin müavini Qraçya Sərkisyan az öncə maraqlı bir etiraf edib. Deyib ki, ölkənin müdafiə xərcləri heç vaxt Azərbaycanın hərbi büdcəsinin həcminə çatmayacaq. Onun sözlərinə görə, 2026-cı il üçün dövlət büdcəsində Müdafiə Nazirliyinə ayrılacaq məbləğin azaldılıb-azaldılmayacağı hələlik məlum olmasa da, “nazirlik gələn ildə də 2024 və 2025-ci illərdəki məntiqlə işləyəcək”.
Xatırladaq ki, Ermənistanın 2025-ci il üçün hərbi büdcəsi 1,7 milyard dollar təşkil edir. Bu da ÜDM-in 6%-i deməkdir. Hansı ki, NATO ölkələrində də yoxdur. Alyans ölkələri təzəlikcə Trampın təzyiqi altında hərbi xərcləri tədricən ÜDM-in 5%-i həddinə qaldırmağa razı olublar. Azərbaycana gəlincə, builki büdcədə müdafiə və milli təhlükəsizlik xərclərimiz 5 milyard dollar həcmindədir. Yəni Ermənistanın rekord həddəki hərbi xərclərindən təxminən üç dəfə çox.
Bunu da yada salaq ki, avqustun 8-də Ağ Evdə Bakı və İrəvan arasında sülh sənədinin paraflanmasından az sonra Nikol Paşinyan ölkənin böyük hərbi büdcəyə ehtiyacı olmadığını söyləyib. Bunu isə o, Azərbaycanla müharibə ehtimalının faktiki sıfra enməsi ilə izah edib.
Reallıq həmçinin belədir ki, sərhəddə aylardır sakitlik hökm sürür. Bu fonda Paşinyanın təyyarəsinin ilk dəfə Azərbaycan səmasından istifadə etməsi diqqət çəkir.
Bəs erməni nazir müavininin sözləri nədən xəbər verir? Azərbaycanın üstünlüyü etiraf edilirsə, gələn il Ermənistan özünə indikindən az hərbi büdcə müəyyən edə bilərmi?
Rövşən Məhərrəmov
Hərbi ekspert, polkovnik Rövşən Məhərrəmov “Yeni Müsavat”a bildirdi ki, Ermənistan müdafiə nazirinin müavininin Azərbaycan və Ermənistanın hərbi büdcələri ilə bağlı müqayisəli açıqlaması baş nazir Nikol Paşinyanın 8 avqustda Vaşinqtonda Azərbaycan Prezidenti İlham Əliyevlə imzaladığı razılaşmadan irəli gəlir və reallığı əks etdirir: “Azərbaycanın hərbi büdcəsi Ermənistanın hərbi büdcəsindən üç dəfə artıqdır. Ermənistanın hərbi büdcəsi əslində ordusunun şəxsi heyətinin sayı və ölkənin ümumi büdcəsi nəzərə alınarsa, əslində az məbləğ deyil. Ermənistan son illərdə Hindistan və digər ölkələrlə silah almaq üçün müqavilələr bağlayıb, sürətlə silahlandırılıb. 8 avqustda sülh sazişinin paraflanmasından sonra Azərbaycanla Ermənistan arasında sülh müqaviləsinin imzalanacağı ehtimalının yüksək olmasından irəli gələrək Nikol Paşinyan bundan sonra silahlanmaya çox vəsait ayırmağa ehtiyac olmayacağını deyib. Çünki Ermənistan özünə təhlükə görmür. Azərbaycanın heç bir qanununda, heç bir rəsmi sənədlərində, eləcə də xarici siyasətində Ermənistana qarşı ərazi iddiası əks olunmur. Bunu Nikol Paşinyan şübhəsiz ki, bilir. Həm sülh müqaviləsinin imzalanacağına inam, həm bu amil Ermənistan hakimiyyətini məntiqli olaraq arxayınlaşdırır və arxayınlaşdırmalıdır. Buna görə də Ermənistan arxayın şəkildə hərbi büdcəsini artırmaya, hətta azalda bilər”.
Hərbi ekspert qeyd etdi ki, təhdidlər aradan qalxarsa, gələcəkdə Azərbaycanın da hərbi xərclərini azaltmasından danışmaq olar: “Azərbaycanın beş milyard dollar hərbi büdcəsi təkcə silahlanmaya ayrılmayıb. Ordunun saxlanma xərcləri, təminat və digər xərclər var ki, bunlar çox böyük vəsait tələb edir. Azərbaycanın dəniz sərhədləri də mövcuddur və bir neçə ölkə ilə sərhədik. Azərbaycan hərbi dəniz qüvvələrini də gücləndirməlidir. Bu işə də böyük vəsait sərf olunur və olunmalıdır. Bütün bu sadaladığım amilləri nəzərə alaraq güman edirəm ki, Azərbaycanın hərbi büdcəsi azaldılmayacaq”.
Etibar SEYİDAĞA,
“Yeni Müsavat”
