Ötən ilin dekabr ayında TƏBİB-in icraçı direktoru Vüqar Qurbanov mətbuat konfransında bildirmişdi ki, 200-ə yaxın həkim ölkə xaricindən qayıdaraq Azərbaycanda fəaliyyət göstərməyə başlayıb. O qeyd etmişdi ki, xaricdə yaşayan həkimlərlə daim əlaqə saxlanılır.
“İlk dəfə açıqlayım ki, Almaniyada yaşayan bir qrup həkimin ölkəyə gətirilməsi ilə bağlı pilot layihə həyata keçirəcəyik. Həkimlərlə danışıqlar aparılıb, bizə kifayət qədər dəstək olurlar. Almaniyadan gələn həkimlərin gələn ildən regionlarda fəaliyyətə başlaması nəzərdə tutulur”, – o vurğulayıb.
Vüqar Qurbanov Musavat.com-un əməkdaşına açıqlamasında bildirib ki, pilot layihə çərçivəsində həkimlər 5 rayonu əhatə edən bir bölgədə çalışacaqlar:
“Həkimlərin sayı və hansı bölgədə çalışmaları ilə bağlı pilot layihə işə düşəndə dəqiq açıqlama veriləcək. Söhbət ilk növbədə cərrahi tibbi xidmətin qurulmasından gedir”.
TƏBİB-in mətbuat katibi Zamirə Ədilova Musavat.com-un sorğusuna cavab olaraq qeyd edib ki, Almaniya, Türkiyə, Rusiya, Ukrayna, Gürcüstan və Tacikistandan ixtisaslı həkimlərin Azərbaycana cəlbi üzrə pilot layihə artıq fəaliyyətə başlayıb:
“2024-cü ilin dekabrından 2025-ci ilin sentyabrınadək müxtəlif ixtisaslar üzrə 30-dan çox həkim işə qəbul edilib. Onların sırasında mama-ginekoloq, kardioloq, pediatr, ümumi cərrah, uroloq, neonatoloq, şüa diaqnostikası üzrə həkim, təcili və təxirəsalınmaz tibbi yardım üzrə həkimlər və digər ixtisas sahibləri var. Mütəxəssislər respublikanın bir sıra tibb müəssisələrində – Respublika Pediatriya Mərkəzi, Respublika Təcili və Təxirəsalınmaz Tibbi Yardım Mərkəzi, Kliniki Tibbi Mərkəz, Sabunçu Tibb Mərkəzi, Yeni Klinika, Mingəçevir, Şirvan, Qax, Zaqatala, Kürdəmir, Samux, Sabirabad və Gəncə mərkəzi xəstəxanalarında fəaliyyət göstərir. Hazırda xaricdən cəlb olunan mütəxəssislər həm kliniki fəaliyyətə qoşulub, həm də yerli kadrlarla bilik və təcrübə mübadiləsi aparırlar. Növbəti mərhələdə onların sayının artırılması və fəaliyyət istiqamətlərinin genişləndirilməsi nəzərdə tutulub”.
Nigar HƏSƏNLİ,
Musavat.com
