Azərbaycan Prezidenti İlham Əliyev bu gün Qəbələdə keçirilən Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündəki çıxışında çox vacib nüanslara toxundu. Ölkə başçısının çıxışında diqqətçəkən məqamlardan biri də 8 avqustda Ağ Evdə imzalanan üçtərəfli sənədlə bağlı oldu.
İlham Əliyev bildirdi ki, iki ay əvvəl Vaşinqtonda Azərbaycanla Ermənistan arasında sülh sazişinin paraflanması Cənubi Qafqazı sülh məkanına çevirəcək.
Dövlət başçısı ATƏT-in Minsk qrupunun ləğvinin vacibliyini vurğulayaraq, bununla keçmiş münaqişənin bu qalıqlarının da aradan qaldırıldığını qeyd etdi.
Politoloq Züriyə Qarayeva Musavat.com-a bildirib ki, Prezident İlham Əliyevin Türk Dövlətləri Təşkilatının Qəbələ zirvəsində səsləndirdiyi bəyanat Cənubi Qafqazda tamamilə yeni mərhələnin başlanğıcını təsdiqləyir:
“Vaşinqtonda paraflanmış sülh sazişi regionun uzun illər davam edən qarşıdurma dövründən sabitlik və əməkdaşlıq fazasına keçidini təmin edir. Ən mühüm məqam isə ATƏT-in Minsk qrupunun və əlaqədar strukturların rəsmi şəkildə bağlanmasıdır – bu, Azərbaycanın 30 illik diplomatik mübarizəsinin yekunu kimi dəyərləndirilir. Artıq “münaqişə bölgəsi” anlayışı siyasi leksikondan çıxır, yerini “sülh və əməkdaşlıq məkanı” anlayışına verir. Bu proses həm Azərbaycan-Ermənistan münasibətlərində yeni səhifə açır, həm də Cənubi Qafqazda regional inteqrasiyanın və iqtisadi bərabərləşmənin reallaşması üçün real zəmin yaradır”.
Cavanşir ABBASLI
Musavat.com
