İşğaldan azad olunmuş Ağdamda genişmiqyaslı bərpa və quruculuq işləri davam edir. 30 ilə yaxın düşmən tapdağı altında qalan, “Qarabağın Xirosiması” adlandırılan şəhər bu gün dirçəlişin, yenidənqurmanın rəmzinə çevrilib.
Azərbaycan hökuməti tərəfindən həyata keçirilən layihələr çərçivəsində Ağdamda infrastruktur tamamilə yenidən qurulur, yaşayış və sosial obyektlər tikilir, müasir şəhərcik salınır. Artıq bir neçə küçə boyunca asfaltlanma işləri yekunlaşıb, içməli su, kanalizasiya və elektrik xətləri çəkilib.
Musavat.com xəbər verir ki, Ağdam şəhərinin Baş planı Prezident İlham Əliyevin 2021-ci ilin mayında imzaladığı sərəncama əsasən hazırlanıb. Şəhər “ağıllı şəhər” və “yaşıl enerji” konsepsiyasına uyğun formalaşdırılır. Yeni enerji infrastrukturu günəş və külək mənbələrindən istifadəni nəzərdə tutur.
Hazırda Ağdamda həm də sənaye zonası sürətlə formalaşır. “Ağdam Sənaye Parkı”nda artıq bir sıra yerli və xarici şirkətlər fəaliyyətə başlamaq üçün müqavilələr imzalayıb. Parkda inşa olunan müəssisələr regionda yeni iş yerlərinin açılmasına, iqtisadi canlanmaya təkan verəcək.
Ağdamda aparılan quruculuq işləri təkcə şəhərin fiziki dirçəlişini deyil, həm də mənəvi dirçəlişini ifadə edir. İllər sonra doğma yurduna dönəcək insanlar üçün yeni evlər, yeni imkanlar yaradılır.
Bu gün Ağdam torpağı hər bir azərbaycanlı üçün qürur, səbr və zəfərin simvoludur. İşğalın izlərini silən, dağıntılar üzərində yeni həyat quran bu şəhər Qarabağın gələcəyinə işıq saçır.
Şahanə Rəhimli
Musavat.com
