“Azərbaycan-Qazaxıstan əlaqələrinin mədəni-dostluq zəminindən strateji partnyorluğa çevrilməsi mümkündür” – Politoloq
Azərbaycan Qazaxıstan üçün müstəsna ölkə, qardaş dövlətdir.
Bu bəyanatla Azərbaycan-Qazaxıstan Ali Dövlətlərarası Şurasının ikinci iclasında Qazaxıstan Prezidenti Kasım-Jomart Tokayev çıxış edib.
Qazaxıstan dövlətinin başçısı vurğulayıb: “Bizi ortaq tarixi köklər, zəngin mənəvi-mədəni irs, nəhayət uyğun mentalitet, hadisələrə, vəziyyətin inkişafına baxış birləşdirir. Bu sarsılmaz təməl üzərində çoxşaxəli əməkdaşlığımızı uğurla inkişaf etdiririk”.
Politoloq Nicat Qasımov BiG.AZ-a bildirib ki, Qazaxıstan neft-dəmir yolu, Bakı-Ceyhan, Bakı-Tbilisi-Kars kimi layihələrdə maraqlı ola bilər. Azərbaycan isə öz növbəsində Şimal-Cənub və Beynəlxalq Orta Asiya-Xəzər xəttində aktiv iştirak etmək istəyir. Bu çərçivədə iki ölkənin strategiyaları bir-biri ilə üst-üstə düşə bilər:
“Qazaxıstan üçün Qərbdən Asiyaya uzanan və Çin-Rusiya keçidini təmin edən şəbəkələr önəmlidir. Azərbaycan isə Qərbə və Türkiyəyə açıq qapı rolundadır. Bu baxımdan əməkdaşlıq şərqdən-qərbə və cənubdan-şimala yönümlü tranzit şəbəkələrinin şaxələndirilməsi deməkdir.
Hər iki dövlət üçün vacibdir ki, əməkdaşlıq başqa böyük güclərin müdaxiləsinə gətirib çıxarmasın. Qazaxıstan-Azərbaycan tandeminin bu baxımdan “öz yolunu” çəkmək istəyi görünür.
“Qardaş dövlət” ifadəsi sadəcə metafora deyil, qardaşlıq anlayışı mədəni, təhsil, dil, diaspora dairələrində də investisiya tələb edən sahələrin açılışı deməkdir. Bu baxımdan iki ölkə arasında sosial və humanitar əməkdaşlıq dərinləşə bilər.
Tokayevin bəyanatı regionunda yeni bir diplomatik başlanğıca işarə edə bilər. Azərbaycan-Qazaxıstan əlaqələrinin mədəni-dostluq zəminindən strateji partnyorluğa çevrilməsi mümkündür. Amma bunun gerçəkləşməsi üçün siyasi iradə, infrastruktur yatırımları və iqtisadi uyğunluğun təmin edilməsi vacib olacaqdır. Əgər bu şərtlər ödənərsə, iki ölkə orta və uzun müddətdə həm qarşılıqlı fayda, həm də regional sabitlik üçün güclü bir blok meydana gətirə bilər”.
