2 noyabr 1993-cü ildə Prezident Heydər Əliyev televiziya və radio ilə xalqa müraciət edərək ölkə əhalisini Ermənistan ordusunun işğalçı hücumlarına qarşı səfərbərliyə çağırıb. Müraciətindən sonra minlərlə insan Milli Orduya səfərbər olunub. Qeyd edək ki, bu tarixi müraciət Ermənistanın hərbi təcavüzünün başladığı gündən dövlət rəhbəri səviyyəsində Azərbaycan xalqını mübarizəyə səsləyən, səfərbər olmağa çağıran ilk çağırış olub.
Bu tarixi çıxışında Ulu Öndər dövlətçiliyin mühüm atributlarından biri olan ordunun böhran vəziyyətinə gətirilməsinin səbəb və səbəbkarlarından geniş söhbət açmış, yeni silahlı qüvvələrimizin yaradılması üçün xalqın və dövlətin qarşısında dayanan vəzifələrdən danışmışdı. Ümummilli Lider, həmçinin diqqətə çatdırmışdı ki, Azərbaycanın gələcək taleyi, onun mövcudluğu xalqın öz əlindədir: “İndi bizim ordumuz yaranmalı və qurulmalıdır. Bir də qeyd edirəm, ordumuz ancaq Azərbaycanı müdafiə etmək məqsədi daşıyır. İşğalçılıq məqsədi daşımır. Bizim işimiz haqq işidir, gərək hər bir vətəndaş bunu özünün şərəfli borcu kimi qəbul etsin. Kim özü orduda qulluq edə bilirsə, qoy könüllü surətdə getsin. Kim özü qulluq edə bilmirsə, yanındakıları başa salsın ki, gedib orduda xidmət etmək lazımdır. Yaxud əgər özü orduda qulluq edə bilmirsə, fikirləşsin ki, orduya necə kömək etmək lazımdır. İndi bunların hamısı ən zəruri vəzifələrdir. Bütün xalqa, Azərbaycan vətəndaşlarına müraciət edirəm ki, bu tədbirlərin həyata keçirilməsində fəal iştirak etsinlər”.
Bir sözlə, bu müraciət hərb quruculuğu sahəsində yaxın və uzaq gələcək üçün Azərbaycan xalqının qarşısında dayanan proqram sənədinə çevrildi. Belə ki, Ulu Öndərin müraciətində toxunduğu nöqsanların aradan qaldırılması üçün çevik qərarlar qəbul edildi, orduya rəhbərliyi çətinləşdirən əhəmiyyətsiz idarəetmə strukturları ləğv edildi nizam və intizamı lazımi tələblərə cavab verməyən şəxslər ordudan uzaqlaşdırıldılar və s.
Nəticədə ordu sıralarına səfərbər olunan könüllülərin sayəsində 1993-cü ilin sonu, 1994-cü ilin əvvəllərində Füzuli istiqamətind əməliyyatlar həyata keçirilmiş, işğal olunmuş bəzi yaşayış məskənləri, strateji yüksəkliklər düşməndən azad edilmişdi. Həmin günlərdə Ümummilli Lider demişdi: “Qarşıda Füzuli rayonunun digər hissələri var, Cəbrayıl var, Zəngilan var, Qubadlı var, o yandan Ağdam, digər rayonlar var. Bunların hamısını biz azad etməliyik”.
2003-cü ildən respublikamıza rəhbərlik etməyə başlayan Prezident, Ali Baş Komandan İlham Əliyev Silahlı Qüvvələrimizin döyüş imkanlarının artırılmasını daim diqqət mərkəzində saxladı, bu istiqamətdə davamlı şəkildə hərbi islahatlar həyata keçirdi. Eyni zamanda Ali Baş Komandan İlham Əliyevin rəhbərliyi ilə ordumuz 2016-cı ilin dördgünlük Aprel döyüşlərində, 2018-ci ilin mayında Günnüt əməliyyatında, 2020-ci ilin iyununda Tovuz döyüşlərində, 2020-ci ilin 44 günlük Vətən müharibəsində, həmçinin lokal antiterror əməliyyatlarında hərb tariximizə şərəfli səhifələr yazdı. Nəticədə ölkəmizin ərazi bütövlüyü və suverenliyi tam bərpa olundu. Bununla da Müzəffər Ali Baş Komandan həm də Ulu Öndərin dediklərini həqiqətə çevirdi.
Qvami Məhəbbətoğlu, “İki sahil”
