“Düşünürəm ki, burada elə bir təəccüblü məqam yoxdur. Çünki Rusiya Xarici Kəşfiyyat Xidməti mütləq şəkildə Ermənistanda öz agenturasından da, texnikasından da istifadə edir”.
Deputat, Milli Məclisin Müdafiə, təhlükəsizlik və korrupsiyaya qarşı mübarizə komitəsinin sədri Arzu Nağıyev bu fikirləri Musavat.com-a açıqlamasında bildirib.
Xatırladaq ki, Rusiyanın Xarici Kəşfiyyat Xidməti “İrəvanın öpüşü” başlıqlı press-relizdə Ermənistanın siyasi səbəblərdən Moskvadan “qopmaq” və Rusiya əvəzinə daha bahalı Ukrayna taxılını almaqla Kiyevə kömək etmək niyyətində olduğunu iddia edib.
Bu barədə danışan millət vəkili ardınca aşağıdakıları vurğulayıb:
“Məlumdur ki, Ermənistan Kollektiv Təhlükəsizlik Müqaviləsi Təşkilatının üzvüdür və bu ölkədə Rusiyanın hərbi bazası yerləşir. Bu məlumatları əldə etmək elə də çətin bir proses deyil. Yəni səfirliklər, diplomatik rabitə xətləri, dövlət strukturlarının şəbəkələri, bunlar hamısı izlənilə də bilər, məlumat da götürmək mümkündür.
Digər məsələ budur ki, xüsusilə Ermənistanın dövlət qurumlarının istər kompüterləri, serverləri, istərsə də Paşinyanın istifadə etdiyi kommunikasiya vasitələri mütləq nəzarətdədir. Ermənistanın bütün strukturları Rusiya üçün çox maraq kəsb edir. Eyni zamanda NATO və Rusiya sərhədi, Türkiyə, Ermənistan sərhədi olduğu üçün mütləq şəkildə bu reallıqdan istifadə olunur”.
Agentura məsələsinə gəldikdə, komitə sədri Rusiyaya dəfələrlə səfər etmiş Köçəryan, Sərkisyan və yaxud onlara loyal olan qruplaşmaların Rusiya xüsusi xidmət orqanları ilə əlaqəli insanlar olmasına da diqqət çəkib:
“Məlumatlar diplomatik dairələr, Rusiyaya yaxın şəxslər vasitəsilə sızır. Yəni bir daha Rusiya xarici kəşfiyyatı göstərməyə çalışır ki, biz hər addımdan xəbərdarıq, kəşfiyyat məlumatımız var”.
Arzu Nağıyevin fikrincə, Rusiya bununla öz varlığını sübut etməyə çalışır:
“Yəni bu, klassik kəşfiyyat hesabatı deyil, informasiya üçün psixoloji əməliyyatlar “İrəvanın öpüşü” press-relizinin məqsədi – bu başlıq da təbii ki, mətndəki ironik yanaşmadır – Paşinyanı qərbpərəst kimi göstərmək, iqtisadi baxımdan qeyri-məntiqi qərarlar verən bir baş nazir kimi ortaya qoymaqdır”.
A.Nağıyev hesab edir ki, bu, həm də Avropa İttifaqı və Fransaya bir mesajdır:
“Bu, “biz sizin də danışıqlarınızı eşidirik, biz sizi də izləyirik”, deməkdir. Bu, həm də ictimaiyyətə seçkiqabağı “Paşinyan Rusiyanı satır”, mesajıdır. Bu gün Ermənistan idxal etdiyi taxılın 80%-ni Rusiyadan alır. Paşinyanın reaksiyası isə “biz Rusiya taxilindən imtina etmirik”, oldu. Bu, kəşfiyyat sızmasından sonra yaranan diplomatik zərər nəzarəti cəhdidir. Yəni ictimaiyyətə “Rusiya ilə münasibətlərdə sabitlik var” deməklə Moskvaya mesaj verir. Düşünür ki, daxili auditoriyada sabitlik, sakitlik olmalıdır.
Moskva-İrəvan münasibətlərində seçki öncəsi bu kimi məsələlər, müxtəlif suallar daha çox ortaya çıxacaq. Hətta etimad böhranı da yarana bilər. KTMT, Avrasiya İqtisadi Birliyi çərçivəsində passivləşmə, Qərblə təhlükəsizlik dialoqunun gücləndirilməsi bir daha göstərir ki, münasibətdə gərginlik var”.
Milli Məclisin komitə sədrinin fikrincə, Rusiya Paşinyan hökumətinin müstəqil xarici siyasət kursunu bəyənmir və Ermənistana qarşı çıxmaq üçün hər cür addım atacaq:
“Yəni nə qədər desələr də ki, Paşinyan hakimiyyəti Rusiyaya xəyanətlə yaxınlaşır, bu, inandırıcı görünmür. Paşinyan həm qərbyönümlü kursuna sadiqdir, həm də Rusiya ilə əlaqəni kəsmək istəmir. Yəni əsas məsələ odur ki, yüksək ehtimalla real dinləmə və sızma var. Lakin burada Paşinyanın mövqeyi müdafiə taktikası seçməkdir. Rusiya-Ermənistan münasibətlərində nə qədər etimadsızlıq mərhələsi olsa da, soyuq müttəfiqlik hələ də qalmaqdadır.
Gələcəkdə isə məlumdur ki, Moskva İrəvana qarşı daha çox psixoloji və iqtisadi rıçaqlardan istifadə edəcək. Çünki qarşıdakı ən ciddi məsələ seçkilərdir. Təbii ki, burada Zəngəzur dəhlizi kimi bir reallıq da var. Eyni zamanda kommunikasiyaların açılması və sülh müqaviləsinin imzalanması məsələsi də ortadadır. Buna görə də Rusiya ciddi cəhdlə bu məsələlərdə öz regional siyasətini həyata keçirəcək”.
E.Paşasoy,
Musavat.com
