Cənubi Qafqazda nəqliyyat-kommunikasiya xətlərinin açılması məsələsi regionun əsas siyasi gündəmlərindən biri olaraq qalır. Xüsusilə Zəngəzur istiqamətində mümkün marşrutların hansı formatda və nə vaxt reallaşa biləcəyi həm siyasi dairələrdə, həm də ictimaiyyət arasında geniş müzakirə olunur. Mövcud siyasi reallıqlar fonunda bu layihənin yaxın perspektivdə həyata keçirilməsi nə dərəcədə real görünür?
Musavat.com xəbər verir ki, mövzu ilə bağlı KONKRET.az-a açıqlama verən Ağ Partiya sədri Tural Abbaslı bildirib ki, “dəhliz” anlayışı müxtəlif formalarda təqdim olunur və bu səbəbdən məsələyə fərqli yanaşmalar mövcuddur.
Onun sözlərinə görə, əgər söhbət TRIP marşutundan gedirsə, həmin marşrutun yaxın 1–2 il ərzində açılması mümkündür:
“Çünki ABŞ-ın maliyyə və siyasi dəstəyi Ermənistan üçün bu məsələdə həlledici rol oynaya bilər. Bu baxımdan marşrutun yaxın zamanda istifadəyə verilməsi real görünür.
Azərbaycanın nəzərdə tutduğu klassik Zəngəzur dəhlizi modeli isə hazırkı şəraitdə mümkün hesab olunmur. TRIP layihəsi çərçivəsində Mehri ərazisindən keçən 42 kilometrlik yol Ermənistanın yurisdiksiyası altında qalır və Azərbaycanın həmin əraziyə birbaşa təsir imkanları yoxdur”.
Partiya sədrinin sözlərinə görə, Azərbaycanın gözlədiyi dəhliz modelində isə yol beynəlxalq hüquqi statusa malik olmalı, Ermənistanın nəzarət və yoxlama səlahiyyətləri məhdudlaşdırılmalı idi:
“Bizim nəzərdə tutduğumuz variantda Ermənistanın yurisdiksiyası tətbiq olunmurdu, beynəlxalq statuslu marşrut olmalı idi və Azərbaycan vətəndaşları həmin yoldan maneəsiz istifadə edə bilməli idilər. TRIP razılaşmasında isə vəziyyət fərqlidir”.
