Vətən müharibəsində şücaət göstərən igidlərimizdən biri də şəhid İsayev Vüsal Firdovsi oğludur.
ARANTV.AZ Sonxeber.az-a istinadən şəhidin qısa həyat hekayəsi ilə izləyiciləri tanış edir:
“Vüsal İsayev 1983-cü il 5 apreldə Yevlax şəhərində anadan olub. 2001-ci ildə Naxçıvana hərbi xidmətə yollanıb, oranı uğurla başa vurub. Vətənə sevgisi onu 2014-cü il iyunun 25-i təkrar ordu sıralarına müddətdən artıq hərbi köməkçi- sanitar təlimatçısı kimi qatılmağa sovq edib.
İşinin peşəkarı, dostları arasında böyük hörmətə malik idi. Ən böyük arzularından biri Qarabağın işğaldan azad olunması olub. Vətən müharibəsi başlayan ilk gündən böyük şücaətlə doyüşlərdə iştirak edib. Hərbçilərə ilk tibbi yardım göstərib. 5 oktyabr Talışkəndi- Suqovuşan istiqamətində gedən döyüşlərdə ayağından yaralanıb. Buna baxmayaraq, köməyə ehtiyacı olan əsgər hərbçi yoldaşlarını tək qoymayıb. Köməyə gedən zaman şəhidlik zirvəsinə ucalıb”.
Şəhidin həyat yoldaşı bildirib ki, “Yoldaşım çox ailəcanlı insan idi. Şəhid olmamışdan 5 gün qabaq mənimlə telefonla danışıb halallaşdı. Hər ikimiz kövrəldik. Mənə dedi ki, həyatdı möhkəm ol, hər şey ola bilər. Dövlətimizə həmişə güvənmişəm ki, sənin və uşaqlarımızın yanında olacaq. Mən, o, belə danışanda dedim ki, mən sənsiz nə edərəm? O da cavabında dedi ki, sənə o cür oğlan qoyub gedirəm, bir neçə ilə böyüyəcək, mənim yerimi tutacaq. Onun yoxluğu mənimçün ağırdır”.
Qeyd edək ki, şəhidimizin özündən sonra geriyə bir qız, bir oğlan yadigar qalıb.
