Məsuliyyətimizi artıraq, qanunlara, qadağalara tabe olaq
İkinci Qarabağ müharibəsində düşməni məğlub edən ordumuzun qələbəsinə sevinən dünya azərbaycanlıları, müsəlman ölkələri, dost dövlətlər Azərbaycanla həmrəyliklərini bildirdilər. 30 ilə yaxın düşmən işğalında qalan torpaqların azad olunması ilə doğma yurda qovuşmaq həsrətinə son qoyulması insanların əhval-ruhiyyəsini yüksəldib. İllərdən bəri böyüyüb, boya- başa çatdığı ata-baba ocağını ziyarət etmək istəyənlərin tələskənliyi də anlaşılandır. Amma unutmaq olmaz ki, o torpaqlar illərdən bəri insan qanına susayan, ayaqları dəyən yerləri xarabazara çevirən erməni faşistlərinin, vəhşilərin nəzarəti altında qalıb. Bu baxımdan vətəndaşlar özlərinin, başqalarının həyatını qorumaq üçün daha məsuliyyətli olmalı, qadağan olunan ərazilərə gediş-gəlişlə bağlı xəbərdarlıqlara əməl etməlidirlər. Son günlərdə minadan təmizlənməmiş ərazilərə icazəsiz gedişlər zamanı baş verən bədbəxt hadisələr üzücü olmaqla, daha ehtiyatlı olmağı tələb edir.
İşğaldan azad olunmuş rayonlara səfərləri zamanı bu amili diqqətə çatdıran Prezident İlham Əliyev Minatəmizləmə Agentliyinin İdarə Heyətinin sədri Vüqar Süleymanovu videoformatda qəbul edərkən işğaldan azad olunmuş ərazilərə icazəsiz səfərlər zamanı gözlənilən təhlükələrdən, risklərdən də söz açdı: «Azad edilmiş torpaqlarda son günlərdə və müharibədən sonra əfsuslar olsun ki, bədbəxt hadisələr baş verir. Mən Azərbaycan vətəndaşlarına müraciət etmək istəyirəm, onlardan xahiş edirəm ki, azad olunmuş torpaqlara icazəsiz, qanunsuz getməsinlər. Mən insanların bu addımlarını bir tərəfdən başa düşürəm, onlar uzun illər vətən həsrəti ilə yaşamışlar, hər bir keçmiş məcburi köçkün tezliklə öz doğma torpağına, doğma kəndinə qayıtmaq istəyir, ancaq xahiş edirəm ki, gözləsinlər. Bir qədər gözləsinlər ki, minalardan təmizləmə işləri başa çatsın. Çünki bu, böyük təhlükədir, həm piyadalara, həm avtomobillərə böyük təhlükədir.»
Dövlət başçımızın bu tövsiyələri insanların təhlükəsizliyinin qorunması, gözlənilən risklərin qarşısının alınması baxımından əhəmiyyətli olmaqla insanları daha məsuliyyətli olmağa səsləyən çağırışdır. İnfrastruktur layihələrinin həyata keçirildiyi ərazilərin minalardan, partlamamış hərbi sursatlardan təmizlənməsinə artırılan diqqət risklərin qarşısının alınmasına yönələr həyati məsələdir. Ərazilərin minalardan təmizlənməsi üçün təcrübəli mütəxəssislərin cəlb edilməsində, dünyanın aparıcı şirkətlərinin istehsalı olan ən müasir texnikalardan istifadədə məqsəd baş verə biləcək qəzaların qarşısını vaxtında almaqdır. Minalardan təmizləmə əməliyyatlarının miqyasını genişləndirmək üçün Prezident İlham Əliyevin tapşırığına əsasən Müdafiə Nazirliyində əlavə istehkamçı taborlar yaradılır. Daim yanımızda olan qardaş Türkiyədən Azərbaycana gələn istehkamçıların, xüsusi təlim almış itlərin minatəmizləmə işlərinə cəlbi ilə işlər daha da sürətlənir, peyk təsvirlərindən istifadə etməklə təhlükəli ərazilər müəyyənləşdirilir. Minatəmizləmə əməliyyatları üzrə milli standartlar hazırlamaqla əməliyyatların ardıcıllıqla davam etdirilməsi, prioritetlərin düzgün müəyyənləşdirilməsi, Operativ Qərargahın fəaliyyəti səmərə verəcək. Pilot layihə olan «ağıllı kənd»” konsepsiyasının tətbiqində də məqsəd insan həyatının qorunması üçün vacib amillərə xüsusi diqqətlə yanaşılmasıdır. «Biz bu torpaqlara qayıtmaq istəyirik və keçmiş köçkünlər, əlbəttə ki, bu arzularla 30 il yaşayıblar. Onların hisslərini başa düşmək olar. Amma, eyni zamanda, onların və onlarla birlikdə olanların təhlükəsizliyi birinci dərəcəli məsələdir» söyləyən Prezident İlham Əliyev son günlərdə işğaldan azad olunmuş ərazilərə icazəsiz səfərlər zamanı baş verən bəxbəxt hadisələr zamanı həyatını itirənlər, xəsarət alanlar üçün narahatlığını da bildirir.
Bu sadalananlar dövlətin vətəndaşlara göstərdiyi diqqətdir. Amma çox təəssüf ki, bəzi insanlar həyatlarını təhlükəyə ataraq gizli yollarla, qanunsuz olaraq minalardan təmizlənməmiş ərazilərə gedirlər. Doğma torpaq həsrəti çəkən insanların səbrsizliyindən yaranan risklər təkcə bir nəfərin deyil, bütün ailənin, həlak olanların yaxınlarının qəmi, kədəridir. Məntiqi nəticə isə budur ki, xatirələrinin ardınca gedən, görmək istədiyi evini, keçirdiyi uşaqlıq, gənclik illərinin sevincini yaşamaq istəyənlər məsuliyyətsizlikləri səbəbindən həyatlarını riskə atır, yaxın günlərdə çatacaqları istəklərini əbədi itirirlər. Yəni, olunan xəbərdarlıqlara, qoyulan qadağalara əməl etməklə əvvəlkindən də gözəl evlərində yaşamaq qisməti insanın öz əlindədir. Necə deyərlər, cinayətdən sonra tövbənin xeyri yoxdur. Müdriklər də söyləyib ki, nə iş görürsənsə onu ehtiyatla gör. Sivilizasiyanın bir əlaməti də insanın düşünməyi, düzgün hərəkət etməyi bacarmasıdır. Hara getmək istəyənə həyat yol verir. Qanunlara tabe olaq ki, həyatımızın qiymətini də bilək. Gələcəkdə bizi gözləyən xoş günlərimizi düşünülməmiş tələskənliyə qurban verməyək. Ən başlıcası isə özümüz ailəmiz, cəmiyyət qarşısında məsuliyyətimizi artıraq.
