Ötən həftə Prezident İlham Əliyev “Azərbaycan Hava Yolları” Qapalı Səhmdar Cəmiyyətinin, “Azərbaycan Dəmir Yolları” Qapalı Səhmdar Cəmiyyətinin, “Bakı Metropoliteni” Qapalı Səhmdar Cəmiyyətinin və Bakı Nəqliyyat Agentliyinin tabeliyindəki “BakuBus” Məhdud Məsuliyyətli Cəmiyyətinin Azərbaycan İnvestisiya Holdinqinin idarəetməsinə verilməsi haqqında” Sərəncam imzalayıb. Sərəncama əsasən, bu müəssisələr də Azərbaycan İnvestisiya Holdinqinin idarəetməsinə verilib.
Bugünlərdə “Postpandemiya dövründə vergi sistemi” adlı konfransda çıxış edən iqtisadiyyat naziri, həmçinin Azərbaycan İnvestisiya Holdinqinin Müşahidə Şurasının üzvü Mikayıl Cabbarov deyib ki, dövlət investisiyalı şirkətlərində vəziyyət günün tələblərinə cavab vermir və bir sıra hallarda idarəetmənin effektivliyi aşağıdır. Onun sözlərinə görə, fəaliyyət sahələri, şirkətlərin xərcləri, tender prosedurları sahələrində şəffaflıq tam təmin edilməyib: “Bu şirkətlər büdcə gəlirlərinin formalaşmasında mühüm rol oynamalı olduğu halda bir çox hallarda zərərlə çalışırlar. Artıq bu sahədə ciddi islahatlar həyata keçirilir. Dövlət şirkətlərinin effektivliyinin artırılması onların ciddi bazar dəyərinə nail olunmasına gətirib çıxarılmalıdır. Dövlət şirkətlərinin borclanmalarına nəzarətin gücləndirilməsi, dövlət büdcəsinə dividend ödənişlərinin artırılması qarşımızda hədəf kimi durur və 2020-ci ildə yaradılmış Azərbaycan İnvestisiya Holdinqi hazırda bu sahədə çalışır”.
Qeyd edək ki, sözügedən Holdinqin idarəetməsinə verilən və verilməsi nəzərdə tutulan iki şirkətin məhsul və xidmətlərinin tarifləri bu il artıb.
İqtisadçı Elman Sadıqov hesab edir ki, bu, dövlət büdcəsinə qısamüddətli gəlir, orta və uzunmüddətli xərc gətirəcək bir amildir: “Yəni, bu müəssisələr strateji müəssisələrdir və onların tariflərinin artımı 2021-2022-ci illər üçün ən təhlükəli risklərdən biri sayılan inflyasiya riskini daha da tətikləyəcək. Bu isə növbəti mərhələlərdə artan büdcə xərcləri deməkdir”.
E. Sadıqov qeyd edib ki, müəssisələrdə optimallaşdırmanın həyata keçirilməsi dedikdə təəssüf ki, 2 əsas amil göz önünə gəlir: “Birincisi, həmin müəssisənin xidmət və ya məhsul qiymətlərini artırması, ikincisi işçi heyətinin ixtisarı. Amma, bu 2 addıma qədər atılacaq bir çox səmərəli addımlar vardır. Bir çox hallarda şirkətlər siyasətlərini düzgün həyata keçirdikdə qeyd etdiyim 2 addımı atmadan şirkətlərinin mənfəətə çıxmasına nail olurlar. Variantlar çoxdur”.
