Astaranın Zəfər parkı
Vətən müharibəsində Qarabağımızın azadlığı uğrunda öz canını qurban verən qəhrəman Azərbaycan oğullarınin sırasında 41 astaralı gənc də vardı. Bütün rayon camaatı indi bu, igidlərlə fəxr edir, onların şərəfini uca tuturlar. Hazırda şəhərin Heydər Əliyev prospektində şəhidlərin xatirəsinə Zəfər parkı tikilir. Ərazisi 1400 kvadratmetr olan parkın inşaat işlərini “Elnur-2 ULKS” şirkətinin işçiləri aparırlar. Artıq parkda abidənin tikintisi başa çatıb, ərazi hasara alınıb, hörgü işləri görülübdür. Suvaq isə yüksək zövqlə tamamlanmaq üzrədir. Bundan sonra üzlük və tamet daşlarının düzülməsinə başlanar. Həm də xalqımıza şanlı zəfər sevinci bəxş edən qalib Azərbaycan əsgərinin abidəsi ucalan ərazidə yaşılıq salınar, müxtəlif növ bəzək və gül kolları əkilər.
Soyuq qış günləri olsa da, Zəfər parkinda görülən işlər sənginmir. İnşaatçılar verilən tapşırıqları yüksək keyfiyyətlə yerinə yetirir, aprel ayında parkın tikintisini başa çatdırmağa çalışırlar.
Zəfər Orucoğlu, Azərbaycan Jurnalistlər Birliyinin üzvü
