Məlumdur ki, hazırda ölkəmizdə pandemiya ilə əlaqədar karantin rejimi hökm sürür.
Pandemiyanın bitməsi koronavirus infeksiyasına qarşı aparılan tibbi- profilaktik mübarizədən və vaksinləşmə tədbirlərindən asılıdır.
Bütün bu məqamların fonunda isə, heç nəyə baxmayaraq, insanları düşündürən yalnız bir sual var – Karantin rejimi nə vaxt bitəcək?
Bununla bağlı Sonxeber.az-a danışan AHİB- nin üzvü, həkim- cərrah Ədalət Rüstəm bildirib ki, ölkəmizdə əhalinin yarı faizi vaksinləşdirliməlidir ki, bu ilin axırınadək kollektiv immunitet yaransın:
“Vaksin vurulan məntəqələrin sayını artırmaq lazımdır ki, sözügedən proses ölkəmiz üçün tez yekunlaşsın. Vaksinlərin tibb məntəqələrinə paylanılmasında problemlər var. İnsanlar var ki, birinci doza vaksini artıq vurdurublar, ikinci doza vaksin hələki olmadığından onların bu prosesə cəlb olunması ləngiyir.
Müsahibimiz bildirib ki, hazırda bəzi tibb məntəqələrində birinci, bəzilərində isə ikinci doza vaksinlərin sayında çatışmazlıq var:
“45 gün ərzində vaksinasiya olunanlar əhalinin ən intizamlı hissəsidir. Vaksinləşməni əhali arasında ən azı 50- 60 faizə çatdırmaq lazımdır ki, pandemiyada müsbət nəticələr əldə edə bilək. İyun ayı üçün maksimum 10 faiz vaksinləşmə prosesini həyata keçirə bilərik. Təəssüf ki, həmin prosesin 10 faiz olması kollektiv immunitetin yaranması demək deyil.
Azərbaycanda isə hazırkı faizlərlə hesablasaq, pandemiyanın gələn ilin mart ayına kimi davam edəcəyini, əhalinin yarısının vaksinlə təmin olunacağını deyə bilərik”.
