Martın 19-dan “sms icazə” sistemi geri QAYIDIR? – AÇIQLAMA
Azərbaycanda son günlər yoluxanların sayında kəskin artım müşahidə olunur. Belə ki, martın 17-də Azərbaycan Respublikasında koronavirus (COVID-19) infeksiyasına 840 yeni yoluxma faktı qeydə alınıb, 268 nəfər müalicə olunaraq sağalıb. Yoluxanların sayındakı artım “sms icazə” sisteminin geri qayıdacağı ehtimalını ortaya çıxarıb. Azərbaycanda “sms icazə” sistemi geri qayıda bilərmi?
Bununla bağlı Sonxeber.az-ın sualını cavablandıran professor Adil Qeybulla bildirib ki, bu epidemioloji vəziyyətdən asılı olacaq:
“Yoluxma sayı artarsa və epidemioloji vəziyyət pisləşərsə bu müəyyən problemlərə yol aça bilər. Biz ikinci dalğada gördük ki, bəzi tədbirlərin zamanında görülməməsi xəstəxanalarda yer probleminin olmasına gətirib çıxardı. Ona görə də düşünürəm ki, 3-cü dalğada qərarlar zamanında verilməlidir. Əlbəttə bu stiuasiyadan aslıdır. Əgər epidemioloji vəziyyət pisləşərsə, karantin rejimi sərtləşdirilə və “sms icazə” sisteminə geri qayıdıla bilər”.
