Hər şey genlərimizdədir: Balıq yağı hər kəs üçün faydalı deyilmiş
Bəzi mütəxəssislər hesab edirlər ki, son zamanlar balıq yağının faydaları şişirdilir. Ən azından bəzi insanlar üçün bu belədir. Onlar aşkar ediblər ki, balıq yağı yalnız müəyyən genotipə məxsus insanlarda ürək-damar sağlamlığı üçün faydalı ola bilər. İnsanların bu pəhriz əlavəsini qəbul etməsi ilə bağlı indiyədək aparılan tədqiqatlarda onların genetik meyli nəzərə alınmırdı.
Balıq yağının qanda xolesterol və trigliserid səviyyələrini aşağı salmaqla insanın ürək-damar sistemi üzərində faydalı təsir göstərdiyinə inanılır. Ürək-damar xəstəlikləri üçün risk faktoru bu maddələrin artan səviyyəsidir.
Elmi araşdırmalar illərdir balıq yağının ürək və damar sağlamlığı üçün faydalarının o qədər də böyük olmadığını göstərmişdir. Əczaçılıq şirkəti “AstraZeneca” effektivliyi şübhə doğurduğu üçün balıq yağı əsaslı bir dərmanın klinik sınaqlarını belə dayandırdı.
ABŞ-ın Corciya Universitetinin alimlərinin rəhbərlik etdiyi tədqiqat qrupu ürək-damar xəstəliklərinin genetik fonunu öyrənməyi öz üzərinə götürdü. Bunu etmək üçün 70 min könüllünün genetikası və sağlamlığı ilə bağlı məlumatlardan istifadə etdilər.
Tədqiqatçılar ürək xəstəliyinin göstəricisi sayılan dörd qan lipidinin (ümumi xolesterol və trigliseridlər daxil olmaqla) səviyyəsi ilə maraqlandılar. Elm adamları mövcud məlumatları iştirakçıların balıq yağı qəbul edib-etmədiklərinə görə iki hissəyə böldülər.Hər iki qrupun bütün genetikasında tədqiqatlar apardılar və sonunda səkkiz milyon genetik variantı müqayisə etdilər.
Müəyyən edildi ki, GJB2 geninin iki genotipi (variantları) AG və AA var və onlardan AG variantına məxsus insanlarda balıq yağından sonra triqliçeridlərin qanda səviyyəsi düşüb. AA variantında isə əksinə balıq yağı triqliçerid səviyyəsini daha da yüksəldib.
Tədqiqatın müəllifi hesab edir ki, hər bir insanın müalicəsində gen təhlilləri daha effektiv müalicəyə imkan yarada bilər. Tədqiqatın nəticələri “PLOS Genetics” jurnalında dərc edilib.
