Ermənistanda bəzi qüvvələrin revanşist ritorikası indiki halda sadəcə sabun köpüyünü xatırladır. Qarşı tərəf dünyada mövcud olan ikili standartlardan şiriniklənərək Qarabağ məsələsi ətrafında vəziyyəti dəyişməyə çalışır, vəziyyəti başqa istiqamətə yönəltməyə cəhd göstərir. Ancaq rəsmi Bakı bir daha erməni faşizminin baş qaldırmayacağını bəyan etməklə düşmənin törətdiyi cinayət əməllərinə, vandalizm aktlarına görə məsuliyyətdən qaçmaq cəhdlərinə çox ciddi zərbələr vurur. Buna rəğmən erməni lobbisi və havadarları bu günlərdə xüsusi fəallıq göstərməyə başlayıblar.
Günlər öncə 10 noyabrdan bu yana ilk dəfədir ki, atəşkəsin intensiv pozulması barədə xəbərlər yayıldı. Qubadlının Şurnux kəndi istiqamətində və Zəngilan rayonunun Seyidlər kəndi istiqamətində dövlət sərhədində təxribatlar törədilib. Bugünə qədər Ermənistan Müdafiə Nazirlyinin və ya Ermənistan Sərhəd Xidmətinin insidentlə bağlı açıqlaması yoxdur. Bunun əvəzinə Qarabağdakı erməni separatçıları belə bir açıqlama yayıblar ki, güya Azərbaycan Ordusu Xankəndini və Əsgəranın iki kəndini atəşə tutub və guya bunun nəticəsində Xankəndidə hansısa evin damına zərər dəyib. İrəvanda çox gözəl başa düşürlər ki, Zəngəzur dəhlizi ilə bağlı bəndin icrası avtomatik olaraq 10 noyabr bəyanatının digər bəndlərinin də yerinə yetirilməsini şərtləndirəcək. Bu isə revanşizm ideyasının dəfn edilməsi ilə yanaşı Qarabağın müstəqilliyinə dair iddiaların tamamilə yox olacağı deməkdir. Belə bir perespektiv separatçıları əlbəttə ki, razı sala bilməz.
Bu vəziyyət bölgədə yenidən toqquşma ehtimallarını artırır. Ermənistan hakimiyyəti ilə erməni separatçılarının birgə planı eyni zamanda Azərbaycanla Rusiyanı üz-üzə qoymaqdan ibarətdir. Ancaq buna Rusiyadakı siyasi mərkəzlərin özü də rəvac verirlər. ABŞ prezidenti Co Baydenin qondarma “erməni soyqırımı”nı tanımasını hayların əl-qolunu daha da açacaq böyük siyasi səhv hesab edə bilərik.
Ermənistanda da görürlər ki, rəsmi Bakının 10 Noyabr bəyanatının üçtərəfindən biri olan Kremlə ünvanladığı sualların sayı artıb. Bu suallar cavablandırılmadığı kimi təxribatların sayı da artır. Biz həm təxribatlara layiq cavab verməli, həm də qabaqlayıcı addımlar atmalıyıq. Ən maraqlısı odur ki, sərhəddəki insident barədə Ermənistanla yanaşı Rusiyadan da reaksiya yoxdur. Bunun əvəzinə Rusiya saytları Qarabağ separatçılarının son açıqlamasını yaymaqla postkonflikt dövründə Ermənistanın informasiya savaşındakı gücünə güc qatmağa davam edirlər.
Bu gün Prezident İlham Əliyevin BMT-nin Asiya və Sakit okean üçün İqtisadi və Sosial Komissiyasının 77-ci sessiyasında çıxış edərkən növbəti dəfə Ermənistan-Azərbaycan münaqişəsinin sona çatmasını elan etməsi isə Rusiya sülhməramlı kontingentinin nəzarətində olan ərazilərdə hələ də formal olaraq mövcud separatçı rejimin qalıqlarının növbəti təxribat cəhdlərinin onlar üçün ağır nəticələnəcəyi mesajıdır.
Bəyanatın əsas bəndi olan Zəngəzur dəhlizi ilə bağlı işlərin başlamasından sonra Ermənistanın buna müxtəlif vasitələrlə əngəl törətmək cəhdləri də nəticəsiz qalacaq. Azərbaycanın regionda dayanıqlı sülh və təhlükəsizliyi təmin etmək arzusunda olduğunu Prezident İlham Əliyev BMT-nin sessiyasında bildirməklə rəsmi Bakının regiondakı yeni planlarını bir daha açıqlayıb. Dövlət başçısı hazırda Azərbaycan ərazisindən Asiyanı Avropa ilə birləşdirən Şərq-Qərb dəhlizinin tərkib hissəsi olacaq “Zəngəzur nəqliyyat dəhlizi” üzərində işlərin getdiyini bildirib: “Bu dəhliz Azərbaycana Avrasiyanın nəqliyyat və logistika mərkəzi kimi mövqeyini gücləndirməyə imkan verəcək. Mən Asiya və Sakit okean hövzəsindən olan tərəfdaş ölkələri bu regional layihənin potensialını nəzərdən keçirməyə dəvət edirəm”.
Görünən odur ki, Azərbaycanı heç bir əngəl, heç bir maneə, heç bir təxribat yolundan döndərə bilməyəcək. Nəyin bahasına olursa olsun, rəsmi Bakı Zəngəzur dəhlizini icra edəcək. Çünkü Zəngəzur dəhlizinin yaradılması Azərbaycanın milli, tarixi və gələcək maraqlarımıza tam cavab verir.
